Australasia

Australasia iku sebutan tumrap kawasan ing Oséania kang nyakup Australia, Niu Selan lan pulo-pulo ing saubengé ing Samodra Pasifik. Istilah iki diciptakaké déning Charles de Brosses sajeroning bukuné Histoire des navigations aux terres australes (1756) lan asal saka basa Latin kang tegesé "kidul Asia". De Brosses mbédakaké Australasia saka Polinésia (ing sisih wétané), Mikronésia ing wétan-lor, lan Magellanika ing kidul-wétan Samodra Pasifik.

Australasia

Dideleng saka sisih géografi fisik, bawana Australia, Tasmania, Niu Selan, lan Mèlanésia kalebu sajeroning Australasia, sauntara iku miturut géografi pulitik, istilah "Australasia" kadhangkala dipigunakaké yumrap Australia lan Niu Selan waé, umpamané ing jeneng-jeneng organisasi. Jeneng "Australasia" naté dipigunakaké wektu Australia lan Niu Selan ngirim tim gabungan menyang Olimpiade 1908 lan Olimpiade 1912.

Saka sisih ékologi, "Australasia" iku kawasan kang duwé sajarah évolusi kang seragam lan warna-warna flora lan fauna kang mung tinemu ing tlatah iki. Ing pangertèn iki, Australasia yaiku Australia, Pulo Irian lan pulo-pulo ing saubengé, kalebu Pulau Lombok lan Sulawesi sarta pulo-pulo ing Indonésia kang dumunung ing sisih wétané kaloro pulo mau. Niu Selan ora kalebu yèn migunakaké dhéfinisi iki. Garis bayangan kang misahaké Australasia karo Asia yaiku Garis Wallace – Kalimantan lan Bali dumunung ing sisih kulon, yaiku ing Asia.

Deleng uga

• Oséania Cedhak
• Hamparan Sunda
• Oséania
• Mèlanésia
• Indo-Pasifik

Réferènsi

• Richards, Kel (2006). "Australasia". Wordwatch. ABC News Radio. Dibukak ing 30 September 2006.
• Australasia-Encyclopædia Britannica Edisi Kasewelas