Korrie Layun Rampan

Korrie Layun Rampan (lair ing Samarinda, Kalimantan Wétan, 17 Agustus 1953; umur 70 taun) ya iku sastrawan Indonésia. Bapaké jenengé Paulus Rampan lan ibuné jenengé Martha Renihay-Edau Rampan, saka ètnis Dayak Bawanaq. Nalika isih enom, Korrie uripé ing Yogyakarta. Ing kutha iku dhèwèké kuliah. Sinambi kuliah, dhèwèké aktif sajeroning kagiyatan sastra. Dhèwèké mèlu ing Persada Studi Klub—ya iku klub sastra—kang diasuh déning Umbu Landu Paranggi. Sajeroning klub iki wis lair pirang-pirang sastrawan kang misuwur, kaya déné Emha Ainun Nadjib, Linus Suryadi A.G., Achmad Munif, Arwan Tuti Artha, Suyono Achmad Suhadi, R.S.

Korrie Layun Rampan

Ing taun 1987 Korrie wiwit kerja ing Jakarta minangka wartawan lan èdhitor buku kanggo pirang-pirang penerbit. Banjur, dhèwèké dadi penyiar ing RRI lan TVRI Studio Pusat, Jakarta, mulang, lan dadi Dirèktur Kauangan ngrangkep Rédaktur Pelaksana Majalah Sarinah, Jakarta.

Wiwit Maret 2001 dadi Pamimpin Umum/Pamimpin Rédhaksi Koran Sendawar Pos kang metu ing Barong Tongkok, Kabupatèn Kutai Kulon, Kalimantan Wétan. Saliyané iku, dhèwèké mulang ing Univèrsitas Sendawar, Melak, Kutai Kulon, Kalimantan Wétan. Sajeroning pemilu 2004 dhèwèké tau dadi anggota Panwaslu Kabupatèn Kutai Kulon, nanging banjur mundur amarga mèlu pratélan dadi calèg. Déning konstituèn, dhèwèké dipitayakaké makili rakyat ing DPRD Kabupatèn Kutai Kulon période 2004-2009. Ing législatif iku Korrie dadi Ketua Komisi I. Sanajan wis dadi angota DPRD, Korrie tetep aktif nulis gawéyané minangka jurnalis lan duta budaya. Pirang-pirang karya wis katulis, kaya ta novèl, cerkak, geguritan, carita anak, lan esai.