Ronald "Ron" Bilius Weasley utawa kang luwih ditepungi kanthi jeneng Ron Weasley ya iku tokoh fiksi gawéane J.K Rowling kang dadi salah siji pemeran utama kajaba Hermione Granger lan Harry Potter sajeroning sèri filem lan buku Harry Potter. Karakter Ron Weasley diperanaké déning Rupert Grint kang wis meranaké dadi Ron nganti sèri filem pungkasan (kaping 7).[1]

Ron Weasley ing Harry Potter and The Half Blood Prince

Biografi besut

Ron lair tanggal 1 Maret 1980 ya iku murni-keturunan penyihir (darah murni), lan anak kaenem saka Arthur Weasley lan Molly Weasley.[2] Ron adik saka Bill Weasley, Charlie Weasley, Percy Weasley, Fred Weasley lan George Weasley, lan duwé adhi siji jenengé Ginny Weasley. Ron lan kulawargané urip ing The Burrow. Ron wiwit lumebu Sekolah Sihir Hogwarts taun 1991 lan kalebu ing asrama Gryffindor. Ing kéné Ron wiwit kekancan kraket karo Harry Potter lan Hermione Granger.[2]

Ciri-ciri fisik besut

Ron duwé ciri-ciri fisik khas kulawarga Weasley ya iku: rambut abang lan kulit bintik-bintik. Nalika isin kupingé malih dadi abang. Duwé mripat kang wernané biru lan irung kang dawa, awak dhuwur, kuru lan duwé tangan lan sikil kang gedhé-gedhé. Pawakané Ron padha karo Bill lan Percy.[2]

Karakteristik besut

Ron siji wong kang lucu, nanging kerep émosional, lan ora sènsitif. Bisa gawé guyu wong liya lan kanca-kancané. Nanging samangsa-mangsa bisa nglarani atiné wong liya, racaké Hermione lan Luna Lovegood. Rong duwé témperamèn kang dhuwur mligi nalika wong kang ditresnani dilarani. Ron seneng Quidditch lan posisiné dadi kiper. Ron sènsitif nalika mbahas kaanan kulawargané kang mlarat lan nalika awaké dipadha-padhaké karo seduluré liyané. Ron Arachnofobia (wedi marang temangga), amarga biyèn nalika cilik bonéka beruangé diowahi dadi temangga karo Fred. Ron seneng mangan, uga seneng ngomong nalika lagi mangan, kang nggawé Hermione ora seneng. Kaya harry, Ron siji wong kang pinter nanging rada kesèd nalika ana ing kelas. Ron wong kang wani, dhèwèké bisa tahan ana ing kaanan kang mbebayani karo loro kancané ya iku Harry lan Hermione. Ron uga seneng nglakoni tumindak kanthi cara gampang amarga dhèwèké ora seneng kerja kang abot-abot. Ron uga protektif karo wong kang ditresnani.[2]

Cathetan sikil besut