Rum (unjukan mawi alkohol)
Rum (rhum) inggih punika unjukan mawi alkohol saking asil fermentasi lan distilasi saking molase (tetes tebu) utawi toya tebu ingkang kalebet produk samping indhustri gula. Rum asil distilasi wujud cuwèran warna bening lan padatanipun dipunsimpen kanggé prosès pematangan ing jero tong ingkang dipundamel saking kayu ek utawi kayu jinis sanèsipun. Produsen rum paling ageng ing donya punika nagara-nagara Karibia lan sedawanipun aliran Kali Demerara ing Guyana, Amérika Kidul. Kajawi punika, pabrik rum wonten in nagara-nagara sanès ing donya kados Australia, India, Kepuloan Reunion.
Rum kapérang saking manéka jinis kanthi kadar alkohol ingkang béda-béda. Rum putih padatanipun kanggé campuran koktail. Déné rum warna coklat radi emas lan peteng punika kanggé masak, damel kue, lan kanggé campuran koktail. Namung rum mawi kuwalitas inggil kemawon ingkang padatanipun dipununjuk tanpa campuran utawi dipuntambah ès watu (on the rocks). Rum gadhah peranan ingkang wigati wonten ing kabudayan tiyang ing Hindia Kulon lan kondhang minangka unjukan perompak lan Angkatan Laut Karajan Inggris.
Ètimologi besut
Asal-usul tembung rum boten dipunmangertosi kanthi cetha. Kathah pamanggih ingkang ngandharaken bilih asalipun tembung punika saking rumbullion ingkang ateges "hingar-bingar".[1] Pamanggih sanès ngandharaken bilih rum dipunpendhet saking gelas ageng kanggé unjukan tiyang Walanda ingkang dipunsebat rummers, saking tembung roemer utawi gelas ngunjuk.[2] Sanèsipun saged ugi rum punika cekakan saking saccharum (basa Latin untuk gula), utawi arôme (Basa Perancis kanggé aroma).[3] Ing Amérikah Sarékat, istilah "rumme" (rum) wiwit dipunginakaen saking Mèi 1657. Kala punika, Konggrès Persemakmuran Massachusetts (General Court of Massachusetts) menging nyadé unjukan mawi alkohol inggil menapa kemawon namanipun rumme, strong water', anggur, brendi, lan sanèsipun.[3]
Sajarah besut
Asal-usul besut
Wujud wiwitan saking rum punika sampun dipundamel déning tiyang jaman purbakala. Unjukan asil saking fermentasi toya tebu prakiraan sampun dipundamel déning tiyang India lan tiyang Cina kuna.[1] Cara anggènipun damel unjukan mau nyebat wonten ing papan-papan sanès lan dados unjukan brum ingkang sampun dipundamel tiyang Melayu èwunan taun kepengker.[4] Marco Polo nyathet ing abad kaping 14 bilih piyambakipun dipuntaweni unjukan "anggur saking gula ingkang écho sanget" ing papan ingkang sapunika dipunsebat Iran.[1] Distilasi rum kapisan dipunlampahi ing abad kaping 17 déning pekerja perkebunan tebu ing Karibia. Panemunipun punika budak kebon ingkang mangertos bilih molase saged dipunfermentasi dados alkohol.[5] Prosès distilasi dipunlampahi dhumateng asil fermentasi supados pikantuk unjukan mawi kadar alkohol inggil wujud rum ingkang kapisan.