SAR, akronim saka Search and Rescue, ya iku kagiyatan lan usaha golèk, nulung, lan nyelametaké manungsa kang ilang utawa kang lagi ngadhepi bebaya ing musibah-musibah kaya pelayaran, penerbangan, lan bencana.[1] Istilah SAR wis dienggo kanthi internasional, mula ora gumun yèn wis dikenal wong ing donya kalebu ing Indonésia.[1] Operasi SAR ora mung ana ing papan kang abot, kaya ning sagara, alas, ara-ara, ning uga ing kutha.[1] Anggota SAR iku ya iku wong-wong kang wis dilatih mirunggan kanggo nulungi kurban lan ora mbebayakaké anggota SAR liyané.[1] Tim SAR kerja nalika ana musibah kaya ta pesawat tiba, pesawat mudhun darurat, banjur musibah ning sagara kaya kapal kobong, kapal tabrakan, kapal kerem lan ngandas.[2] Semana uga ing musibah liya kaya kobongan, gunung mbledhos, sepur tabrakan lan liya-liyané.[2]

Tim SAR nembé Latian Panyalametan

Ing sajeroning bencana, operasi SAR iku salah sawijiné saka pérangan siklus tanggap darurat bencana.[2] Siklus iku mau kagabung saka pérangan iki, kaya ta nyegah (mitigasi), siaga (preparedness), tanggap darurat (response) lan pamulihan (recovery), dadi operasi SAR iku pancèn péranganing pakaryan kang tanggap darurat.[2]

Cathetan suku besut

  1. a b c d SAR Archived 2019-08-29 at the Wayback Machine.(05 September 2011)
  2. a b c d SAR Archived 2011-08-11 at the Wayback Machine.(05 September 2011)