Sukiyaki (すき焼き, スキヤキ?) ya iku irisan tipis daging sapi, janganan, lan tahu ing sajeroning panci wesi kang dimasak ing ndhuwur meja mangan kanthi cara digodhog. Sukiyaki dipangan kanthi nyelupake irisan daging ing kopyokan endhog pitik.

Sukiyaki

Janganan kanggo sukiyaki tuladhané bawang bombay, unclang, sawi putih, shungiku (jeneng godhong saka wit kulawarga seruni), jamur shiitake, lan jamur enoki. Kanggo njangkepi, ditambahake ito konnyaku utawa shirataki kang wujde kaya soun, wernane bening utawa rada klawu.

Jinising Sukiyaki besut

Ana rong jinis sukiyaki, ya iku Sukiyaki saka tlatah Kansai lan Sukiyaki saka Kanto kang seje anggoné nyuguhake, jinising bumbu lan rasané.

Miturut sukiyaki saka Kansai, sukiyaki mung dimasak nganggo bumbu kecap asin lan gula pasir, déné sukiyaki saka kanto dimasak nganggo saos warishita (campuran dashi, kecap asin, gula pasir, lan mirin kang dimasak luwih dhisik).

Sukiyaki Kansai, rajangan gajih sapi dijeri ing panci sadurungé ngalebokake rajangan daging sapi. Bumbune ya iku gula pasir lan kecap asin ditambahake ing daging kang wis mateng banjur diudheg karo janganan nganti mateng. Miturut cara Kanto, bumbu warishita dimasak nganti umub dhisik ing panci, banjur bahan-bahan liyané dimasak.