Wagashi (和菓子? roti Jepang) ya iku istilah utawa unen-unen basa Jepang kanggo roti lan permèn tradhisional Jepang. Tembung wagashi dianggo kanggo mbedhakaké roti tradhisional Jepang lan kuwèh lan permèn saka manca nagara (Yōgashi) kang ditepungaké wong Éropah marang wong Jepang wiwit jaman Meiji. Kuwèh saka Tiongkok kang ditepungaké duta kaisar marang Dinasti Tang, kuwèh kang diarani Namban-gashi kang ditepungake misionaris saka Éropah uga kalebu wagashi.

Sakuramochi

Kuwèh tradhisional Jepang kang kalebu wagashi padatan kuwèh-kuwèh jinis mochi, manjū, dango, lan woh garing. Wagashi padatan disuguhaké nalika upacara ngombé tèh, mula sapérangan akèh wagashi rasané mung siji, ya iku legi. Ing upacara ngombé tèh, wagashi kang disuguhaké pamangku gati kudu entèk sadurungé ngombé tèh kang bokmanawa rasané pait utawa sepet.

Saliyané dipangan, wagashi uga didadèkaké miangka karya seni kang éndah disawang. Kaéndahan wujud lan warna wagashi kerep luwih digatèkaké tinimbang rasané. Saliyané iku, wagashi kudu nggambaraké kaéndahan alam patang mangsa ing Jepang. Ing mangsa panas tuladhané wujud lan kelir wagashi kudu bisa mènèhi rasa adhem kanggo wong kang nyawang.

Pranala njaba besut