Agatha Christie's Poirot

Agatha Christie's Poirot iku siji sérial acara télévisi Britania kang ditayangaké ing ITV saka tanggal 9 Januari 1989 nganti 13 Novèmber 2013. David Suchet maragakaké Hercule Poirot, siji détèktif fiktif karangané Agatha Christie.

Logo sérial iki

Acara tivi iki lawasé 13 mangsa lan 70 épisode gunggungé; saben épisode iku digubah saka siji roman utawa crita cekak anggitané Agatha Christie kang nyritakaké Herculie Poirot, lan mula iku ing saben épisode Hercule Poirot iku dadi détèktif utama kang nglakoni invèstigasi kadurjanan, kerepé rajapati lan uga dadi paraga utama. Mawa épisode pungkasan Curtain: Poirot's Last Case, kang dhedhasar roman Hercule Poirot pungkasan, kabèh karya sastra pokok anggitané Agatha Christie kang nyritakaké paraga iki, wis digubah ing télévisi.

Latar wuri carita

David Suchet (2006), aktor kang maragakaké Hercule Poirot, ing foto iki tanpa brengos.

Nalika wadya bala Jerman ing taun 1914 mbedhah Bèlgia, para padunung nagara iki dadi kasangsaran. Akèh warga Bèlgia banjur ngungsi menyang Walanda kang nétral utawa Inggris. Hercule Poirot iku salah sawijiné wong kang ngungsi, dhèwèké iku manten pulisi. Hercule Poirot ditampa kanthi apik ing Styles St. Mary, Inggris lan dadi tresna marang nagarané kang anyar. Sawisé Perang Donya I, awaké manggon ing London lan nyambut gawé minangka détèktif swasta, ing apartemèn Whitehaven Mansions. Dhèwèké diréwangi Kaptèn Arthur Hastings, manten prawira Britania lan sékretarisé Miss Lemon. Dhèwèké uga kekancan apik karo Inspèktur James Japp. Nalika Hastings rabi lan ngalih menyang Argèntina, Poirot banjur ngalih ing tlatah padésan lan karepé péngin pènsiyun, nanging awaké isih kerep ngréwangi wong mecahaké mistèri kadurjanan. Sawisé sawatara kala, Poirot bosen urip ing désa lan bali menyang London, saiki dhèwèké dirkancani George, réwangé.

Hercule Poirot

Hercule Poirot iku protagonis acara télévisi iki lan dhedhasar paraga fiktif karangané Agatha Christie. Poirot iku wong mirunggan kang mesthi bisa golèk solusi kréatif mistèri kadurjanan mawa apa kang diarani awaké dhéwé 'sèl-sèl utak abu-abu'. Dhèwèké iku métodis lan karepé ngrungokaké kabèh fakta dhisik sadurungé nyatakaké soulusiné.

Poirot iku wongé nèces lan gething karo barang kang ora tumata apik utawa ora simètris, kaya ta endhog kang ora padha gedhéné. Klangenané iku sarapan endhog godhog loro, nanging gedhéné kudu padha. Mèbel ing ngomahé iku modèren lan nganggo gagrag Art Deco.

Senadyan Poirot iku baud abasa Inggris, dhèwèké guneman mawa logat Bèlgi lan kerep nganggo tetembungan Prancis. Dhèwèké asalé saka Walonia. Wong-wong Britania kang nasionalis kerep ngarani awaké wong ngamanca. Menawa wong kang diajak ngomong ngarani awaké wong Prancis, dhèwèké mesthi mbenakaké lan ngomong yèn dhèwèké iku wong Bèlgi. Tèmperamèné Poirot iku nuduhaké menawa awaké iku dudu wong Inggris. Senadyan awaké iku grapyak lan nyenengaké, dhèwèké bisa nesu muring-muringan.

Para paraga

Paraga	Fungsi	Mangsa
		1	2	3	4	5	6	7	8	9	10	11	12	13
Hercule Poirot	Détèktif swasta	David Suchet
Arthur Hastings	Captain OBE, asistèné Poirot	Hugh Fraser												Hugh Fraser
Felicity Lemon	Sèkretarisé Poirot	Pauline Moran					Pauline Moran							Pauline Moran
James Japp	Inspèktur Kepala ing Scotland Yard	Philip Jackson												Philip Jackson
Ariadne Oliver	Panulis buku roman détèktif, kancané Poirot										Zoë Wanamaker
George	Réwangé Poirot										David Yelland
Harold Spence	Komisaris Pulisi										Richard Hope
Countess Vera Rossakoff	Kancané Poirot			Kika Markham										Orla Brady

Pranala njaba

• Cuplikan magepokan Agatha Christie's Poirot ing Wikicuplik
• Médhia magepokan Agatha Christie's Poirot ing Wikimedia Commons
• Agatha Christie's Poirot ing Internet Movie Database