Apokat
| Apokat | |
|---|---|
| |
| Woh apokat | |
| Klasifikasi ngèlmiah | |
| Karajan: | Plantae |
| Dhivisi: | Magnoliophyta |
| Klas: | Magnoliopsida |
| Ordho: | Laurales |
| Famili: | Lauraceae |
| Génus: | Persea |
| Spésies: | P. americana |
| Jeneng binomial | |
| Persea americana Mill. | |
Apokat, alpukat, utawa jeneng Latiné Persea americana[1] iku tetuwuhan pangasil woh méja kanthi jeneng padha. Tetuwuhan iki asalé saka Mèksiko lan Amérika Tengah. Saiki akèh dibudidayakaké ing Amérika Kidul lan Amérika Tengah minangka tuwuhan pakebonan monokultur lan minangka tuwuhan pekarangan ing laladan-laladan tropika liyané ing donya. Apokat iki bisa ditemoni ing ngendi waé ing Pulo Jawa.
Wité kanthi dhuwur batang bisa nganti 20 m lan godhongé dawané 12 nganti 25 cm. Kembangé ndhelik kanthi warna ijo semu kuning lan ukuranné 5 nganti 10 milimeter. Ukuran wohé variasi saka 7 nganti 20 sentimeter, kanthi massa 100 nganti 1000 gram; wiji kang gedhé, 5 nganti 6,4 sentimeter.
Wohé wujudé kaya jambu, seukuran kepelan tangan, kelir kulité lumrahé ijo tuwa uga ana kang rada ireng. Woh iki kanggo bahan wédangan dadi ora dipangan langsung. Nèk digawé wédangan kudu diwèhi gula mèn legi uga umum dicampur susu. Sing dipangan iku dagingé kang keliré ijo enom. Apokat kang wis mateng dagingé rada lembèk.
Sajarah besut
Jeneng apokat utawa avokad (saka basa Inggris, avocado) asalé saka basa Aztek, ahuacatl (diwaca kira-kira "awakatl"). Suku Aztek ana ing laladan Amérika Tengah lan Mèksiko. Mula, woh iki nalika awalé ditepungi ing laladan mau.
Nalika wadyabala Spanyol lumebu wewengkon mau watara awal abad kaping 16, manéka tetuwuhan saka laladan iki, kalebu apokat, ditepungaké marang warga Éropa. Wong pisanan kang nepungaké woh apokat marang warga Éropa yaiku Martín Fernández de Enciso, salah siji pamimpin wadyabala Spanyol. Panjenengané nepungaké woh iki nalika taun 1519 marang wong-wong Éropa. Ing wektu kang padha, para wadyabala Spanyol kang njajah Amérika Tengah uga nepungaké kakao, jagung, lan kenthang marang masarakat Éropa. Wiwit wektu iku woh apokat wiwit disebar lan ditepungi déning akèh warga donya. Apokat ditepungaké menyang Indonésia déning Walanda nalika abad kaping 19.
Mupangat besut
Apokat duwé akèh mupangat. Wijiné dipigunakaké sajeroning indhustri pakaian minangka pawerna kang ora gampang luntur. Batang wité bisa minangka bahan bakar. Kulit wité minangka pawerna coklat ing prodhuk saka bahan kulit. Daging wohé bisa didadèkaké panganan sarta dadi bahan dhasar kanggo sapérangan prodhuk kosmètik lan kecantikan.
Apokat duwé asem folat kang akèh[2]. Asam folat dibutuhke mligi kanggo ibu ngandut lan wanita kang lagi ngerencanakna kehamilan, amarga asem folat bisa bantu awak kanggo ngawe lan jaga kasempurnaan DNA (Deoxyribose Nucleic Acid) saha RNA (Ribonucleic Acid) piranti genetik badan, saéngga bisa nyegah janin cacat [2]. Sijiwoh apokat duwé 114 mikrogram asem folat [2]. Jumlah iku bisa nyukupi 30% kebutuhané asem folat ibu ngandut[2].
Alpukat yaiku sumber (lemak tak jenuh) tunggal kang apik lan bisa ningkatna HDL[3]. Liyane iku, alpukat uga duwé betasitosterol kang bisa ngurangi jumlah kolesterol kang diserap saka pakanan [3].
Pranala njaba besut
Cathetan suku besut
- ↑ Alpukat (Persea americana), Copyright © 2008 Plantamor.com (Dipunundhuh tanggal 1 April 2011).
- ↑ a b c d suaramerdeka.com Archived 2012-03-14 at the Wayback Machine. (Dipununduh tanggal 30 Maret 2011)
- ↑ a b kompas.com (dipununduh tanggal 30 Maret 2011)
| Artikel iki minangka artikel rintisan. Kowé bisa ngéwangi Wikipédia ngembangaké. |