Surpanaka: Béda antara owahan

'''Sarpakanaka''' iku siji-sijiné putrané [[Begawan Wisrawa]] sing wadon ing crita [[Ramayana]]. Ing versi [[Indhia]], jenengé Śurpanakha. Ing padhalangan, Sarpakanaka (Sarpakenaka) iki putrane Resi Wisrawa karo Dewi Sukesi sing angka telu. Kadhange tuwa Dewi Sarpakenaka yaiku Prabu Dasamuka (Rahwana) lan Kumbakarna, dene adine kekasih Gunawan Wibisana.

Sarpakenaka iku wujude buta wadhon, tutuke nyrengenges, mripate tlelengan. Padunungane ing Guthaka. Kasektene dumunung ing kukune. Kukune mawa wisa kang ampuh kaya wisane ula weling. Sing sapa kagarit kukune mesthi tumekaning pati.

Nalika Rama Reghawa, Laksmanadewa, lan Dewi Sinta manjing ing sajrone alas Dhandaka, Sarpakenaka kesengsem ndulu wujude Rama lan Laksmana sing bagus kuwi. Banjur malih wanita ayu, niyate nggodha satriya mau. Rama ora mempan digodha, merga wis duwe garwa, Rekyan Sinta. Wanita ayu iku didhawuhi nemoni Laksmana sing isih legan. Laksmana ora keguh digodha Sarpakenaka. Nanging Sarpakenaka tetep mbudidaya murih Laksmana gelem nglanggati kekarepane Sarpakenaka. Laksmana disikep wani lan banjur arep dirodhapeksa. Laksmana duka yayahsinipi. Irunge kenya sulistya malihane Sarpakenaka iku banjur dipuntir nganthi grumpung. Wanita ayu iku sambatkelaran lan sanalika badhar sejatine wujud yaiku Dewi Sarpakenaka kang apaes raseksi. Sarpakenaka banjur ipat-ipat nedya males ukum marang satriya sakloron

Tekan Alengka Sarpakenaka banjur wadhul marang sisihane Ditya Karadusana. Dheweke kandha yen arep dirodhapeksa marang satriya loro kang leledang ana satengahe alas Dhandaka. Karadusana nesu banget, mula banjur lumebu ing alas Dhandaka saperlu nyirnakane satriya sing dianggep arep nyenyamah garwane iku. Nanging wasanane ora Rama Reghawa lan Laksmana sing sirna, nanging malah Karadusana sing tumekaning pati.