Sujeo inggih punika satunggal sèt piranti kanggé dhahar ingkang wonten ing tradisi kulinèr Koréa. Sujeo punika wonten séndhok lan sumpit. Tembung sujeo punika asalipun saking tembung sutgarak (숟가락, séndhok) lan jeotgarak (젓가락, sumpit). Nanging sujeo asring ateges séndhok kemawon tanpa mawi sumpit. Nalika dhahar, sendhok lan sumpit punika boten dipunginaken kanthi sareng lan ugi boten dipuncekel kaliyan kalih asta, nanging séndhok lan sumpit punika dipun-ginakaken kanggé gantosan. Nalika boten dipun-ginakaken sumpit dipunsukakaken ing sanginggilipun méja.

Sujeo
Satunggal set sujeo
Jeneng Koréa
Hangul수저
Alihaksara Koréa Kang SinampurnaSujeo
McCune–ReischauerSujŏ

Sujeo punika dipunsadé kanthi dipunkemas ngginakaken karton utawi kanthong gombal mawi bordiran khas Koréa ingkang gadhah motif simbol-simbol umur ingkang dawa.[1] Minangka piranti kanggé dhahar, sujeo dipunwastani minangka piranti ingkang paling wigati wonten ing pagesangan. Kajawi punika sujeo dados lambang pagesangan ingkang makmur. Awit saking punika, sujeo asring dipuncaosaken minangka bebungah, mliginipun kanggé ulang taun bayi lan ugi adicara mantenan. Sapunika, sujeo ugi dipunsade minangka cenderamata.

Panggunaan sumpit lan sendhok nalika dhahar punika kalebet budaya Koréa ingkang unik, amargi boten kapanggihaken wonten ing budaya kuliner ing Asia Wétan sanèsipun kados ing nagara Cina lan Jepang.[2]

Manawi dipunteliti saking kasilipun pangedhukan (penggalian) wonten ing situs arkéologi, séndhok punika sampun langkung rumiyin dipun-ginakaken déning tiyang Koréa tinimbang sumpit.[3] Séndhok sampun dipun-ginakaken déning tiyang Koréa wiwit saking Zaman Perunggu. Lajeng sumpit punika kapanggih saking artefak asalipun saking jaman Tiga Karajan Koréa.[3] Dhaharan utama tiyang Koréa inggih punika sekul kaliyan sup ingkang dipunwastani jjigae utawi ugi guk. Awit saking punika, rumaos sisah sanget bilih tiyang Koréa mau dhahar tanpa ngginakaken séndhok. Bènten kaliyan sumpit Jepang utawi sumpit Cina ingkang padatanipun dipundamel saking bahan kayu. Amargi sendhok lan sumpit tiyang Koréa punika dipundamel saking logam kados ta kuningan, perunggu, pérak , utawi baja ingkang tahan marang karat. Wonten ing kabudayan Koréa ngginakaken séndhok lan sumpit kanthi wekdal ingkang sami punika dipunanggep boten sopan, mliginipun nalika nembé dhahar kaliyan tiyang sepuh. Padatanipun sumpit namung dipunsukaken ing sanginggilipun méja lan boten dipunlebetaken wonten ing sajeroning dhaharan amargi mitosipun punika saged damel sial amargi kados persembahan dhaharan kanggé kuburan para leluhur [4].

Cathetan suku besut

  1. "수저집". The National Folk Museum.
  2. 주영하. "음식으로 본 한중일 문화인류학 '마지막회'] 효과적인 식사도구 숟가락 한국인만 사용하는 이유는?". 신동아. 2008 (9): 586–697.
  3. a b "スジョ(수저)". Korean Cultural Center.
  4. Sujeo, (dipunakses tanggal 8 Maret 2013)