Bathik Nitik

Bathik Nitik inggih punika motif bathik ingkang asalipun saking Daérah Istiméwa Ngayogyakarta. Motif bathik punika minangka ragam hias ceplokan ingkang kasungsun saking garis-garis alus, balok-balok alit, pasagi sekawan, sarta titik-titik alus ingkang satléraman mèh sami kaliyan tenunan. Kajawi mbentuk pola géomètris, bathik Nitik ugi dumados saking bentuk-bentuk ingkang mralambangaken manéka warni alam, kados ta sekar, ron, kaliyan sulur. Bathik Nitik sampun dados warisan budaya sanès barang wonten ing buku babaran Dirjen Kebudayaan Kementerian Pendidikan dan Kebudayaan 2018.

Titikan

Séntra bathik tulis ingkang ndamel bathik motif Nitik inggih punika Kembangsanga ingkang dumunung wonten ing Désa Trimulya, Jethis, Kabupatèn Bantul. Kaistiméwan Kembangsanga menawi dipun bandhingaken kaliyan séntra bathik tulis sanèsipun inggih punika panganggèning canthing cawang wonten salebeting pandamelan bathik tulis. Bèntenipun canthing cawang kaliyan canthing sanèsipun inggih punika bilih wonten ing ujung canthing dipun sigar dados sekawan saéngga asil gorèsanipun arupi garis sanès titik. Garis-garis ingkang kaukir saking malam medal saking lambé canthing ngasilaken bathik ingkang anggadhahi ciri khas. Ciri khas punika ing wekasanipun dipun wastani Nitik lan dados kaunikanipun Kembangsanga.

Pandamelan bathik Nitik ing séntra Kembangsanga dipun tindakaken kanthi tèknik tulis ingkang mbetahaken wekdal 2-3 wulan. Asilipun, bathik ingkang kadamel langkung rapi kaliyan alus tinimbang bathik ingkang dipun damel kanthi tèknik cap utawi lukis. Ing Kembangsanga, sakabèhing prosès pandamelan bathik wiwit saking pamaringan pola/pamindhahan pola ing kain, pamaringan malam sarana canthing, pamaringan werni, ngantos parampunganipun dipun tindakaken déning para èstri. Pandamelan bathik Nitik nyengkuyung perekonomian bebrayan Kembangsanga dalah dados lapangan pakaryan tetep tumrap para èstri ing ngrika.