Clément Marot lair ing Cahors, Prancis taun 1496 yakuwi anak saka pujangga Jehan Marot, pujangga kasenengané Raja Louis XII lan François I. Clément Marot disekolahaké déning Raja Louis XII lan François I banjur diburuhaké ana kulawarga Seigneur Villeroy. Wiwi taun 1515, Marot wis mbabar geguritané, awujud rondeaux, ballades, épîtres, chants royaux, lan sapanunggalané. Dhèwèké mbabar geguritané jalaran kepéngin dudut kawigatèné raja banjur nganggit geguritan kang sesirah Petite Epître. Sapungkuré babar geguritan Petite Epître raja rumangsa bungah lan biwarakaké pujangga nom kasebut marang adhiné, Marguerite d'Alençon, sawijining wanodya kang pinter lan nguwasani basa Latin, Itali, Jerman, lan Spanyol. Marguerite d'Alençon awèh panjurung ing donyaning seni lan sastra sarta kang duwèni simpati marang gerakan reformasi kang wekasan dadèkaké dhèwèké dadi Reine (ratu) de Navarre. Marot bisa narik kawigatèn bendarané kanthi anggitan tulisan-tulisané, satemah dhèwèké didadékaké minangka juru serat sang ratu[1].

Lukisan Clément Marot

Nanging sabanjuré, wis makaping-kaping Marot kudu ngrasakaké kasunyatan kang pait amarga dhèwèké dilebokaké menyang pakunjaran ing taun 1526. Sebab;e yaiku dipitenah mangan lemak babi ing dina pasa Katolik. Keconggah dhèwèké kebangeten anggoné kekandhan ngandhakaké gagasan-gagasan kang nantang kafanatikan marang agama. Ing taun 1527, dhèwèké bali dilebokaké menyang pakunjaran 12 dina lawasé, amarga jajal ngluwaraké sawijining tahanan. Nanging raja isih paring pangayoman marang Marot, dhèwèké banjur diluwaraké. Antara taun 1527-1534, Marot samsaya disenengi ing karaton Prancis. Dhèwèké dadi sawijining pujangga resmi raja, kang tansah dièloni menyang endi wae. Marot nulis pirang-pirang karya kang ditujokaké mligi kanggo kalodhangan-kalodhangan mirunggan (palakrama François I, surudé ibuné raja, lan liya-liyané). Mungsuh-mungsuhé samsaya mèri marang dhèwèké lan bali manèh mitenah manawa Marot mangan lemak babi ing dina pasa taun 1532. Begja dhèwèké antuk pangayoman Marguerite de Navarre.

Kapustakan besut

  1. Husen, Ida Sundari, 1939- (2001). Mengenal pengarang-pengarang Prancis dari abad ke abad. Jakarta: Grasindo. ISBN 979-695-486-9. OCLC 422880602.{{cite book}}: CS1 maint: multiple names: authors list (link)