Danur 3: Sunyaruri

Danur 3: Sunyaruri iku irah - irahan film sing mentas dibabar 26 September 2019 wingi dening MD Pictures. Film iki diarahke dening Awi Suryadi lan diprodhuksi dening Manoj Punjabi. Film iki minangka terusan saka film sadurunge, yaiku Danur lan Danur 2:Maddah. Kaya film-film sadurunge, film iki uga dijupuk saka novel anggitane Risa Saraswati adhedhasar pengalaman pribadhine. Novel iki nyaritakake lima kanca-kanca setane Risa Saraswati kang jenenge Peter, William, Janshen, Hans, lan Hendrik, utawa sing kerep disebut Peter cs, amarga manut pamrayogine Risa Saraswati ngengingi paraga liyane yaiku, Asih, wis duwe film dhewe.

Ringkesan

Risa (Prilly Latuconsina), pancen duwe bakat kanggo ndelok babagan kang ora lumrah didelok dening manungsa lumrahe. Risa bisa ndelok babagan kang alus utawa ghaib. Malahan, kawit suwe Risa duwe kanca alus awujud lima bocah Walanda sing isih cilik-cilik. Anggone kekancan kaya yen dolanan karo bocah manungsa lumrahe. Peter cs, duwe papan khusus ing loteng omahe Risa kang dinggo dolanan. Kacarita ing film Risa amung urip wong loro karo Riri, adhine sing isih SMP. Dene Risa uwis diwasa lan nduwe sesambungan karo priya aran Dimasta (Rizky Nazar) kang makarya dadi penyiar radio. Sanajan mangkono, Risa ora kandha karo Dimas yen dheweke bisa nyawang bab sing ora katon, lan yen sejatine dheweke duwe kanca sing dudu manungsa amarga wedi yen Dimas bakal ninggal dheweke amarga pribadhine sing beda karo liyane. Anggone Risa kasmaran marang Dimasta iku temenan, amarga Dimasta sing beda karo liyan. Tekane dina ulangtahun e Dimas, Risa pengen gawe sawijining acara mangan bareng ing omahe karo kanca - kanca penyiar radio. Ora lali, Risa uga wanti-wanti karo Peter cs supaya ndhelik sedhela. Ananging, nalika lagi acara dumadakan mobilambulan dolanane Peter cs muni nyedhak ing meja makan. Risa muring banget karo Peter cs. Lan puncake, nalika Dimas lagi ngewangi Risa reresik omah, ana balon sing njedhot lan nggawe Dimas kaget nganti tiba lan kenekan beling saka gelas kang digawa. Saka kene anggone kekancan karo Peter cs mau dadi owah. Pungkasane Risa pilih nutup mata batine supaya ora bisa ndelok Peter cs meneh lan bisa urip lumrah kaya liyane. Anggone nutup mata bathine srana diajari mantra dening Kartika, wong wadon kan nemoni Risa neng hutan. Ananging, ana kedadean sing ora lumrah. Risa pancen wis ora bisa ndeleng Peter cs maneh, ananging malah ngambu danur ana ing ngomahe. Pranyata, ana setan ala kang lumebu ngomah nalika udan deres. Udan kan nyalawadi, ora mandheg masio wus pirang-pirang dina wiwit saka Risa nganakke acara lan mung ngudani omahe. Risa uga nemahi kahanan aneh, yaiku mripate kang abuh lan lara sesisih, ora mari senajan wus ditambani. Setan kuwi mau ala, kang ora mung mbebayani nyawa, ananging uga Peter cs. Setan ala iki asale saka kancane Risa sing kepingin nyolong Peter cs amarga laraning ati.