Gajah-gajahan

Gajah-gajahan ya iku gerak tari kang dilakokaké déning penari lanang. Gajah-gajahan iki kalebu gerak tari kang ngetutaké kepiyé polahé gajah. Gajah-gajahan dilakokaké kanthi patang babak, ya iku ancang-ancang, ngobahaké awak, balèni gerak ancang-ancang lan ngobahaké awak, lan ngrampungi gerakan. Ancang-ancang dilakokaké kanthi nanjak nengen, lengen tengen ditekuk ing ngarep lan tengah awak uga tlapak tangan madhep mengisor nalika lengen ditekuk lan diobahaké menyang tengah awak, diangkat ing sisih kuping kiwa. Sasuwéné nglakokaké ancang-ancang, sikil penari digèsèr ing posisi tanjak kiwa lan sirah miring tengen. Ing babak kapindho, dada diobahaké kaping loro, lengen kiwa medhun ana ing sandhing awak lan sikut diluruské, lan penari nglakokaké gerakan pacak gulu. Nalika lengen kiwa nglakokaké posisi blarak sempal, sikil uga digèsèr bali menyang posisi tanjak tengen. Sawisé kuwi, penari banjur mbalèni gerakan kapisan lan kapindho. Ing gerakan kaping papat, gerakan dirampungi kanthi nekuk sikut kiwa lan nyèlèhaké tangan kiwa ing dhuwur tangan tengen, driji lurus banjur nglakokaké gerak sabetan utawa besut.

Gajah-gajahan