Garebeg Mulud Dal
Garebeg Mulud Dal sajatosipun rerangken adicaranipun sami kaliyan Garebeg Mulud. Nanging, ingkang bèntenaken inggih garebeg mulud punika dipunadani ing taun Dal wonten ing tarikh Jawa-Islam. Kajawi punika ingkang bèntenaken wonten ing Garebeg Mulud kaliyan Garebeg Mulud Dal inggih saking sesajen gununganipun. Bilih wonten ing Garebeg Mulud gunungan ingkang dipunwedalaken wonten gangsal (5) inggih punika Gunungan Kakung, Gunungan Putri, Gunungan Pawuhan, Gunungan Gepak, Gunungan Dharat. Nanging wonten ing Garebeg Mulud Dal kejawi medalaken gangsal gunungan wonten ing nginggil ugi wonten satunggal gunungan malih ingkang langkung mligi inggih punika Gunungan Brama.
Kawontenanipun Garebeg Mulud Dal punika awit saking miyosipun Muhammad ingkang miyos ing tanggal 12 Rabiul Awal taun Dal. Pengetan Garebeg Mulud Dal punika dipunpengeti sewindu sapisan. Wonten ing Garebeg Mulud Dal dipuntontonaken tradisi kejawen saking Sultan. Sultan medalaken manéka warni piranti pusaka karaton ingkang gadhah kasekten wonten ing masarakat umum. Tradisi punika minangka bukti tradhisional bilih Sultan saha Kasultanan Ngayogyakarta inggih ahli waris ingkang sah saking para ratu saha kraton Jawa ing tembe rumiyin. Punika ugi salah satunggaling tindak-tanduk Sultan minangka wakil saking suku bangsanipun kanggé ngluri para leluhur.
[1]
Nalika upacara Garebeg Mulud Dal punika Sultan ugi rawuh wonten ing Masjid Agung Ngayogyakarta kanggé nglampahaken tumindak ingkang langkung religius ingkang asipat Islam. Kajawi nglampahaken tumindak ingkang religius, Sultan ugi nglampahaken tumindak simbolis ingkang boten gayutanipun kaliyan agami inggih punika paring dhawuh kanggé ndhupak satumpuking bata ingkang dipuntata wonten ing ngajeng lawang ing pager témbok sisih kidul Masjid Gedhe. Adicara ndhupak bata punika minangka pratandha bilih rakyat nalika jaman Kesultanan Demak sampun saestu nyingkiri saha ninggalaken agama Hindhu-Buda lan sampun mlebet agami Islam. Upacara punika namung diadani saben wolung warsa sapisan utawi sewindu sapisan nalikanipun wonten upacara Garebeg Mulud Dal.
[1]
Nanging saking sadaya tindak-tanduk saking rerangken upacara Garebeg Mulud Dal utawi Garebeg Mulud biyasa inggih namung kanggé mengeti miyosipun Muhammad. Kanthi adicara punika Sultan sampun netepi kuwajibanipun kanggé nyiaraken agami Islam kados gelar sultan minangka Panotogomo Kalifatullah.[1]