Hodag

Hodag iku sawijining folklor ngenani sawijining sato kéwan sing ana ing praja Amérikah, yaiku Wisconsin. Sujarahé iku mligi nyungku wewengkon ing saubengé kutha Rhinelander ing Wisconsin lor, sing dipitaya minangka papan weweruhané Hodag mau. Makluk iki uga tau disebutaké ing sawenèh carita Paul Bunyan.

Gambarané Hodag

Mulabukané

Ing taun 1893, sawenèh pawarta nglapuraké tetemonan Hodag ana ing Rhinelander, Wisconsin. Makluk iku dnuwéni "sirah kodhok, kanthi rupa kaya gajah raseksa sing lagi merngongos, sukuné lemu lan cendhak lan duwé cakar gedhé sing lancip, gegeré kaya dhinosaurus, lan buntut sing dawa kanthi lawung ing ujungé". Lapuran kuwi or liya diadon-adoni karo tukang survei palemahan, tukang ukur balok kayu, lan tukang akal-akal sing kondhang ana ing Wisconsin, ajeneng Eugene Shephard, sing ngumpulaké sagolongan wong kanggo mbekuk kéwan mau. Wong-wong kuwi kalapuraké yèn dhèwèké butuhaké dhinamit kanggo matèni kéwan kuwi.

Poto-poto saka turahané kéwan kuwi sing angus kobong dibabar menyang médhia. Kéwan kuwi minangka "sarba sing paling galak, paling aèng, lan paling ngegirisi sing ana ing sakurebing langit. Kéwan kuwi pundhes nalika sumber pangan mligi, yaiku kabèh bulldog putih, dadi arang ing wewengkon kana."

Hoaks

Shephard ngakoni yèn dhèwèké uwis tau mbekuk hodag liya ing taun 1896, lan sing iki dhèwèké mbekuk nalika kéwan kuwi isih urip. Miturut lapurané Shepard, dhèwèké lan sawenèh pagelut bruwang mblonyohaké kloroform ing ujungé sawijining galah dawa, sing sabanjuré digawa menyang jero guwa papané makluk kuwi ditelukaké.

Dhèwèké mamèraké hodag mau sing kawitan ana ing pamèran Oneida County. Éwonan wong teka saperlu deleng hodag kuwi ana ing pamèran utawa ana ing omahé Shephard sajeroning sawijining rompok. Shephard bakal ngobah-obahaké makluk kuwi mawa sawenèh kawat sing dikaitaké menyang makluk apus-apusan kuwi, sing lumrahé bakal gawé wong-wong sing delok lumayu amarga kawedèn.

Sawenèh pawarta lokal, nuli wiwit mawartakaké ngenani carita bab makluk urip sing mandra iki, sawijining golongan ilmuwan saka Institusi Smithsonian ing Washington, D.C. mbiwaraké yèn dhèwèké bakal lunga menyang Rhinelander saperlu nitipriksa tetemon sing cetha mau. Pambiwara iki mungkasi anané carita ngenani hodag iki, bebarengan karo Shepard sing akiré kepeksa ngakoni yèn carita bab hodag kuwi amung hoaks.

Akibaté

Hodag sing digambaraké ing reca iki, sing ana ing sangarepé kamar dagangé Rhinelander. 

Hodag iki dadi pralambang resminé kutha Rhinelander, Wisconsin. Hodag dadi maskot saka SMA Rhinelander, lan jenengé uga dadi jeneng saka sawenèh papan bisnis lan organisasi. Sana jaringané kutha Rhinelander uga dijenengi "The Home of the Hodag" utawa "Omahing Hodag". Sawijining reca hodag saka kaca serat sing luwih gedhé saka wujud asliné, sing digawé déning seniman lokal, ana ing sangarepé Kamar Dagang Rhinelander sing narik kawigatèné para tetamu ing kutha mau. Glanggang Ès Rhinelander Arena dadi papané hodag cacah loro, sing siji reca makluk kuwi wutuh sak awak sajeroning sekèthèng, lan sing sijiné manèh yaiku reca awujud sirahé hodag sing gedhené ngluwihi asliné lagi ngepus asep lan nduwé mripat abang mencorong, ana ing pojokan sajeroning ès.

Jenengé lan wujudé hodag kuwi uga dadi jeneng lan ikon sawijining karaméan, Hodag Country Festival, sawijining karaméan musik country taunan sing salah sawijining acara gedhéné brayan-brayan ing Rhinelander, lan sponsoré karaméan musik mau, WHDG, sing njenengi awaké minangka "Hodag Country". Karaméan musik iki narik kawigatèné punjul 70.000 wong saben taun lan lumrahé panyanyi sing mèlu ing karaméan kuwi kaya déné Charlie Daniels, Neal McCoy, Little Big Town, Kellie Pickler, lan Reba McEntire.

Pranala njaba

• Hodag History Video produced by Wisconsin Public Television
• JFK's Hodag - newspaper article about Hodag given to John F. Kennedy on his trip to Rhinelander in 1960