Hormon

Hormon (saka basa Yunani, όρμή: horman - "kang ngobahaké") iku panggawa pesen kimiawi sèl utawa golongan sèl siji lan sijiné. Kabèh organisme multiselular, kalebu tetuwuhan (deleng artikel hormon tetuwuhan), mrodhuksi hormon.

Faktor Régulasi

Faktor régulasi iku senyawa kimia kang ngontrol prodhuksi sapérangan hormon kang duwé fungsi wigati kanggo badan. Senyawa mau dikirim menyang lobus anterior klanjer pituitari déning hipotalamus. Ana 2 faktor regulasi, yaiku faktor pangucul (releasing factor) kang njalari klanjer pituitari nyèkrèsikaké hormon tinentu lan faktor panyandhet (inhibiting factor) kang bisa ngendhegaké sèkrèsi hormon mau. Minangka conto yaiku FSHRF (faktor pangucul FSH) lan LHRF (faktor pangucul LH) kang njalari uculé hormon FSH lan LH.

Hormon Antagonistik

Hormon antagonistik wujud hormon kang duwé èfèk walikan, contoné glukagon lan insulin. Nalika kadhar gula getih asor banget, pankreas bakal mrodhuksi glukagon kanggo ngundhakaké manèh. Kadhar glukosa kang dhuwur njalari pankreas mrodhuksi insulin kanggo ngedhunaké kadhar glukosa mau.