Wikipédia

Kampung Coklat Blitar

Kampung Coklat Blitar yaiku papan rékréasi édukasi kebon coklat kanthi manèka warna saranané kang kuncara ing Kabupatèn Blitar. Kampung Coklat iku tepaké mapan ing Dalan Bantèng Blorok 18, Désa Plasareja, Kacamatan Kademangan. Kampung coklat iki ambané 6,5 héktar kang mroduksi woh kakao kanggo bahan utama agawé coklat.[1] Wisata Kampung Coklat iki uga wus olèh sèrtipikat CHSE (cleanliness, health, safety, environment sustainability) saka Kamantrian Pariwisata lan Ékonomi Kreatip wiwit taun 2020.[2]

Kampung Coklat Blitar

Sajarah

besut

Kampung Coklat iku wiwité saka paternakan kagungané Kholid Mushtofa kang biyèné naté menangi kabangkrutan gedhé jalaran kena virus flu manuk ing taun 2004. Jalaran saka iku, Kholid Mushtofa banjur mbanting setir menyang pakebonan kakao. Ing taun 2005 dhèwèké ayasa Gabungan Kelompok Tani (Gapoktan) ajeneng Guyup Santosa, ana 21 tani kang gabung sajroning pakumpulan iku. Banjur pakumpulan iki nggolèki rega kakao per kiloné ing Surabaya. Nemoni manawa rega kakao Rp.16.000,- per kilo ing Surabaya, Kholid tambah semangat kanggo ngrembakakaké usahané. Taun 2007 dhèwèké wus awit nglebokaké wiji kakao ing pabrik coklat 3,2 ton saben wulan. Dhèwèké sempet ngangsu kawruh babagan coklat ing pabrik coklat Monggo Yogyakarta lan Silver Queen. Ing taun 2013 Kholid awit nggawé coklat dhéwé lan kerja bebarengan karo Anggi Coklat ing Blitar, banjur bubuk coklat iku dipasaraké ing kutha-kutha kayata Sala lan Surabaya. Ing taun 2014 dhèwèké pungkasan bisa ayasa usahané dhéwé kanthi jeneng Kampung Coklat kang kondhang nganti sepréné iki.[1]

Parékonomian

besut

Kakao utawa coklat minangka woh utama kang dipasaraké saka papan wisata iki, sacara garis gedhé ana rong jinis produk kang didol yaiku coklat winih lan coklat olahan.[3]

Pangadolan ing papan wisata

besut

Ing papan wisata iki woh kakao langsung diolah lan didadèkaké ing sembarang jinising barang utawa produk kang didol déning para usahawan UMKM (Usaha Mikro, Kecil, dan Menengah) kang digandhèng déning Kampung Coklat. Ing papan wisata, kakao kang diproduksi saben dinané nganti 3 ton akèhé. Produk olahan kakao iku sarwa coklat, kayata, mie coklat, gedhang coklat, susu kocok coklat, sega goreng coklat, ès krim coklat, saliyané iku uga ana manèka warna barang uga olèh-olèh.[4][5]

Ana manèh produk-produk coklat asli kanthi manèka warna rasa lan jinis kayata ing ngisor iki,

  • Coklat asli
  • Coklat krispi
  • Coklat jeruk
  • Coklat apel
  • Coklat campuran
  • Coklat peteng 67%
  • Coklat peteng 80%
  • Coklat peteng 90%
  • Coklat peteng 100%
  • Bubuk coklat[6]

Pangadolan ing pasar lokal lan internasional

besut

Kanggo pasar lokal rata-rata kang metu saben dinané yaiku 14 ton, ana kang arupa bubuk kakao ana uga kang produk olahan, nanging akèh-akèh produk olahan. Déné produk kang diékspor ing pasar internasional 15 ton wiji saben dinané, kanthi rega Rp.25.000,- saben kiloné.[4]

Panggawéan lan sumber daya manungsa

besut

Anané Kampung Coklat kang binukak déning Kholid Mushtofa iki lumayan bisa nggerus angka pangangguran lan ngundhakaké parekonomian masarakat saubengé Kampung Coklat khususé lan masarakat jaba tlatah wisata iku umumé. Ing taun 2022 ana atusan wong kang nyambut gawé ing papan wisata iki kang cacah tepaké 638 karyawan, 90% saka masarakat saubengé papan wisata, déné kang 10% masarakat sajaba tlatah wisata iku.[7]

Koprasi

besut

Ing Blitar ana kira-kira nganti 7000 among tani kakao kang gumantung saka panèn kakao kang didol ing Kampung Coklat. Among tani iku nggarap lemah kang ambané 4000 héktar ing 22 kacamatan ing Kabupatèn Blitar banjur kasilé disetor ing Koperasi Guyub Santosa, wadah kanggo para tani kang markasé ing ndalemé Kholid Mushtofa. Koprasi iki duwèni produk kang dijenengaké utawa dimèreki Gusan (Guyub Santosa) kang arupa coklat batang, coklat cair, lan bronis coklat.[8] Anané koprasi iki mbantu banget parékonomian warga sakiwa-tengené Kampung Coklat lan para tani kakao Blitar, koprasi iku ora mung wadhah kanggo panyaluran kasil panèn kakao nanging uga papan palatihan para tani kakao kanggo angolah kakao dumadi produk coklat kang becik, wiwit saka cara pambibitan, pananduran, parumatan, tumeka pangolahan wiji kakao kang dumadi coklat siap saji.[9] Para tani kakao kang digandhèng Kampung Coklat ora mung tani saka kuthané dhéwé, nanging uga saka kutha-kutha liya, tuladhané saka Trenggalèk, Madhiun, Gunung Kidul, lan Jawa Tengah.[4]

Wayah operasional

besut

Wayah operasional papan wisata iki saben dina, bukak wiwit tabuh 08.00 WIB nganti tabuh 16.30 WIB. Khusus pungkasing minggu lan dina prèi nasional bukak wiwit tabuh 08.00 WIB nganti tabuh 19.00 WIB.[10]

Rega karcis

besut

Karcis mlebu ing wisata iki kapérang dadi loro yaiku Rp.20.000,- kanggo régulèr lan Rp.35.000,- kanggo terusan.[11] Déné saben wahana wisata bisa beda-beda regané wiwit Rp.5000,- tumeka Rp.20.000,-.[12] Uga ana pirang-pirang pakèt édukasi, yaiku pakèt-pakèt kang wènèh kawruh marang para palajar ngenani pambibitan, panèn, tumeka pangolahan coklat kang pinandu déning para pamandu propésional.[13] Paket édukasi dibedakaké miturut jinis-jinisiing sekolah kayata,

  • Paket A. Kanggo PAUD lan TK. Rp.30.000,- saben wong, kanthi sarana karcis mlebu, pamandu wisata, karya wisata, nandur winih kakao, mecah woh kakao, maès coklat, jajan opak gambir, ombèn coklat, lan sèrtipikat.
  • Paket B. Kanggo SD lan SMP. Rp. 35.000,- saben wong, kanthi sarana karcis mlebu, pamandu wisata, karya wisata, nandur winih kakao, mecah woh kakao, maès coklat, sate woh coklat, ombèn coklat, lan sèrtipikat.
  • Paket C. Kanggo SMA lan Universitas. Rp. 45.000,- saben wong, kanthi sarana karcis mlebu, pamandu wisata, karya wisata, nandur winih kakao, mecah woh kakao, maès coklat, jajan opak gambir, ombèn coklat, forum takon wangsul, lan sèrtipikat.[1]

Pungkasan ana uga Paket Obsèrvasi kang regané Rp 41.000,- saben wong, kanthi sarana karcis mlebu, pamandu wisata, karya wisata, maès coklat, lan ombèn coklat.[1]

Sarana

besut

Ana manèka warna sarana kang sumadya ing papan wisata iki, nalika wisatawan tumeka ing sisih ngarep papan wisata iki ana papan-papan poto kang instagramable. Banjur nalika angliwati lorong kayu, ing kono ana kolam iwak lan jembatan gawèn kang ing saubengé ana wahana dolanan kaluwarga awit saka ndayung prau mini, awèh pakan iwak, nganti spa iwak. Ana uga mobil golf kang diséwakaké kanthi kapasitas 4-6 wong per mobil. Ana uga papan kulinèr kang nyumadyakaké manèka warna jajanan lan panganan. Live music ya ana, biasané mapan ing Balé Coklat, papan iki asring dianggo acara-acara kayata ngundhuh mantu, diskusi, patemon, lan konsèr musik kang ana ing dina-dina prèi.[14][11]

Paugeran lan wewaler

besut

Kanggo njaga asri lan tentreming papan wisata iki, ana sapirang-pirang paugeran uga wewaler kang kudu digugu déning para wisatawan, kayata,

  1. Wewaler Ngrokok. Ora diwenangaké kanggo ngrokok ing papan wisata Kampung Coklat. Iki kanggo njaga karesikan lan katentremaning para wisatawan uga kanggo nyegah risiko kobongan.
  2. Wewaler Nggawa Ingon-Ingon. Ora diwenangaké kanggo nggawa kéwan ingon-ingon. Iki uga kanggo njaga karesikan lan kantentremaning para wisatawan uga nyegah saka karusakan barang kang jinalari déning kéwan ingon-ingon.
  3. Wewaler Nggawa Panganan lan Ombénan saka Jaba. Ora diwenangaké nggawa panganan lan ombénan saka njaba, manawa wisatawan kepengin mangan lan ngombé bisa tuku ing jero papan wisata iki.
  4. Paugeran Karesikan. Wisatawan dikersakaké kanggo njaga karesikan tuladhané bisa mbuang sampah ing papan kang samesthiné.
  5. Paugeran Kaslametan. Wisatawan ngetutaké pituduh kaslametan kang sumadya ing kono, lan dikersakaké kanggo ngadohi barang-barang utawa kagiyatan-kagiyatan kang mancing bebaya.[15]

Cathetan suku

besut
  1. ↑ a b c d "Selayang Pandang Kampung Coklat". Kampung Coklat. 2023-01-23. Dibukak ing 2023-10-09.
  2. ↑ Utami, Tika Vidya (2023-04-28). "Kampung Unik di Blitar, Singgah ke Destinasi yang Jadi Surganya Coklat, seperti Ini Suasananya!". Inews.id. Dibukak ing 2023-10-09.
  3. ↑ "Bank Jatim Dorong Kampung Coklat Blitar Jajaki Pasar Luar Negeri". Bank Jatim. 2023-05-28. Dibukak ing 2023-10-09.
  4. ↑ a b c Zuraya, Nidia (2017-07-12). "Kampung Coklat Blitar Gandeng UMKM Kembangkan Usaha". Republika. Dibukak ing 2023-10-09.
  5. ↑ Kusuma, Budi Darmawan (2018-02-24). "Kampung Coklat Blitar, Wisata Rekomendasi untuk Pecinta Coklat!". Pinhome. Diarsip saka sing asli ing 2023-01-31. Dibukak ing 2023-10-09.
  6. ↑ Karlina, Nisha (2023-07-06). "Kampung Coklat Blitar: Rute, Fasilitas, dan Tarif Masuk". Ngetrip. Dibukak ing 2023-10-09.
  7. ↑ Dewi, Velina Sar; Mukhlis, Imam (2022-04-25). "Analisis Dampak Keberadaan Wisata Edukasi Kampung Coklat terhadap Perubahan Perekonomian Masyarakat di Desa Plosorejo Kabupaten Blitar". Fair Value. 4: 3811. {{cite journal}}: More than one of |pages= and |page= specified (pitulung)
  8. ↑ "Pemilik Kampung Coklat Blitar Ternyata Bekas Pengangguran". Bacaini.id. 2020-04-20. Dibukak ing 2023-10-09. {{cite web}}: |first= missing |last= (pitulung)
  9. ↑ Zubaidah, Eny. "Peran Kampung Coklat dalam Pemberdayaan Masyarakat (Studi di Desa Plosorejo Kecamatan Kademangan Kabupaten Blitar)". Kajian Moral dan Kewarganegaraan. 07: 71. {{cite journal}}: More than one of |pages= and |page= specified (pitulung)
  10. ↑ Putri Chaniago, Suci Wulandari; Tashandra, Nabilla (2023-05-04). "Wisata Kampung Coklat Blitar: Jam Buka dan Harga Tiket". Kompas.com. Dibukak ing 2023-10-09.
  11. ↑ a b "KAMPUNG COKLAT Blitar Harga Tiket Dan Aktivitas Oktober 2023". Travels Promo. 2023-10-02. Dibukak ing 2023-10-09. {{cite web}}: |first= missing |last= (pitulung)
  12. ↑ "Destinasi Wisata Edukasi Andalan, Kampung Coklat Blitar ada Cooking Class dan Playground, 1500 Orang Muat". Surabaya Network. 2023-05-04. Dibukak ing 2023-10-09. {{cite web}}: |first= missing |last= (pitulung)
  13. ↑ BIN, Redaksional (2023-02-14). "Serunya Wisata Sambil Belajar di Kampung Coklat Blitar". Buletin Indonesia News. Dibukak ing 2023-10-09.[pranala mati permanèn]
  14. ↑ Rahman, Praditya Fauzi (2021-12-16). "Rekomendasi Tujuan Wisata di Blitar Murah Meriah, Kampung Coklat". Ayo Surabaya. Dibukak ing 2023-10-09.
  15. ↑ Sarhad, Kerta (2023-08-08). "33 Ulasan Menarik Kampung Coklat, Wisata Edukasi Populer di Blitar". Tiket Masuk. Dibukak ing 2023-10-09.
Dijupuk saka "https://jv.wikipedia.org/w/index.php?title=Kampung_Coklat_Blitar&oldid=1671604"