Wiwit: Béda antara owahan

'''Upacara Wiwit''' mujudaké tatacara Jawa sing diadani saben panèn [[pantun|pari]]. Wiwit wis arang keprungu, nanging déning warga kelurahan [[Ngawen, Ngawen, Blora|Ngawen]], isih diuri-uri. Upacara Wiwit, nèk ning kabupatèn [[Ngawen, Ngawen, Blora|Blora]], karana upacara methik pari. Panènan pari bisa becik lan orané gumantung marang [[Hyang|Gusti Sing Akarya Jagad]]. Upacara Wiwit iku ing désa siji lan sijiné pancèn béda. Ana sing ngarani upacara [[labuh]], lan ana sing mastani nglènggani utawa wiwit. Ning [[Jawa Wétan]] karan '''methik''', wiwit iku kanggoné kadang tani klébu mangsa sing banget nyenengké, mula perlu nindakaké acara iku.

Acara wiwit iku kapérang dadi loro. Sing sepisan ing papan bulak pari panèn, ditengeri kanthi methik pari mantèn. Sapérangan banjur mboyong pari mantèn menyang omahé sing duwé pari, sing duwé pari tumuli mapanaké ing [[lumbung]]. Prastawa sing iki sinebut mboyong pari mantèn. Sepisanan apa ana gandhèngané karo dina pasaran, [[wong Jawa]] pancèn percaya banget karo pétungan dina pasaran, methik pari kudu milih dina becik liyané.

Bojoné sing duwé pari, anaké, perané gedhé banget. Jalaran dhèwèké sing nyiapaké ubarampéné. Ning nekyèn ana alangan bisa dipasrahké wong liya sing isa nggawé sajèn. Sajèné awujud [[jadah]] woran, lintingan bekatul (katul), sega [[sambel]] gèpèng [[kedhelé]] sing digorèng, kembang borèh, wedhak, abon-abon, kinang, juruh, pulo gimbal pulo gringsing, [[godhong]] pulutan (Urène labato), [[endhog]], rakan (arupa uwi-uwi). Sénthé (Colacasiaesculenata), [[gedhang]] sepet kuku, [[jawawut|jewawut]] (Panicumvirida), tebon, jejali. Jewawut lan tebon digerus alus. Rakan didodok ana ing pajang ilang-kranjang sing digawé saka janur-sabanjuré tumpeng alus, tumpeng among-among, sega gurih, [[sega liwet]], sega golong giling, [[kupat]] luwar cacahé loro, kupat lepet loro, kupat bucu lima, [[menyan]], klasan, [[kain]] (jarik) anyar, parem, jungkat, pengilon, ani-ani, kinang, jangan menir, godhong kelor, gerèh pèthèk. Barang-barang mau banjur digawa menyang pinggir [[sawah]] sing arep dipanèn.

Dina sing becik wis katemtokaké. Yèn tiba dina [[Senèn]] [[Paing]], Senèn neptuné papat lan Paing sanga, gunggungé 13. Merga pariné mantèn sajodho, gunggungé pari sing dipethik ana 26 gagang pari. Sakwisé ndonga sinambi mbakar menyan tumuli ngani-ani njupuk 26 gagang pari diiket dadi siji. Ya iki sing jenengé pari mantèn Sri-Sadana. Sakwisé iku sajen-sajen sing ana pajang ilang padha didum mliginé marang bocah sing mèlu Wiwit. Sakwisé iku pari mantèn diboyong nuju [[omah|omahé]]é sing duwé sawah kaya boyongan mantèn. Déné sajèné disèlèh ana lumbung awujud klasa sing ndhuwuré diwènèhi jarit anyar lan diranti dandan wanita kayata wedhak adhem, parem, jungkat, pengilon, kinang, kembang borèh. Kajaba iku uga ana [[jangan menir]], godhong kélor, ani-ani, bekatul lan menyan. Sakwisé sajèn cumepak jangkep, pari mantèn saka sawah banjur dilebokaké ana njero lumbung, dadi siji karo pari mantèn. Werdiné sesajen-sesajen mau kayadéné jajan pasar, rakan, utawa uwi-uwian mengku pralambang dina pasaran lan dina pitu wiwit Senen tekan Minggu. [[Windu]] wolu sarta surya rolas (gunggung sasiné). Dadi anggoné nganakaké Wiwit pètungané sakwisé [[srengéngé]] lingsir, watara jam 12 munggah.

Wong Jawa itungané panèn ana papat: Suku, Watu, Gajah, lan Buta. Menawa tiba Suku èntuké mung gagang, tegesé pariné ora ana èntuké, mung sikil. Menawa tiba Watu pariné awèt dipangan ora gampang entèk. Tiba Gajah katoné panènané akèh naging pariné awet dipangan ora gampang entèk. Tiba Gajah katoné panènané akèh nanging pariné gabug. Nèk tiba Buta pira-pira waé entèk dimangsa buta.