'''Merak''' iku arané spésies manuk cacah telu ing [[génus]] ''Pavo'' lan ''Afropavo'' saka famili [[Phasianidae]], singkang anggotané kaya ta pitik alas lsp. Ana spésies warna loro singkang asli Asiah: merak indhi utawa merak biru asli Indhi, Sri Lanka, lan Pakistan; lan merak ijo asli Myanmar, Indhocina, lan Jawa; lan spésies siji asli Afrikah, ya iku merak kongo singkang mung ana ing Ledhokan Kongo. Merak lanang katitik saka cangungongé (pambengoké) lan elaré singkang éndah. Elar singkang éndah iku katon mliginé ing spésies-spésies merak asli Asiah, singkang wulu ing buntuté ana coraké mata, mung dijleprak nalika mangsané golèk jodho.<ref>{{cite web|url=http://www.britannica.com/eb/article-9058859/peacock|title=Peacock (bird)|work=Britannica Online Encyclopedia}}</ref> Anak merak arané '''uncung'''.
Pigunané warna-warna singkang ndakik ing buntuté iku isih dadi rembuging manéka warna panalitèn ngèlmiah. [[Charles Darwin]] mrakirakaké warna-warna ndakik mau kanggo narik kawigatèné merak wadon lan praèn mentèrèng ing merak lanang ngalami owah gingsir salaras karo pilihan sèksualé. [[Amotz Zahavi]] duwé téyori cacad (''handicap theory'') yèn praèné iku minangka panenger manawa merak lanang waras-wiris amarga yèn merak lanang kurang waras, ora bakal bisa nyengkuyung yasan buntuté singkang gedhé tur mentèrèng mangkono.
