'''Majapait''' iku sawijining praja singkang tau ana ing Tanah Jawa. Praja iki wiwit dibangun taun 1293 [[Masehi|Masèhi]] ing [[Jawa Wétan]]. [[Karajan]] iki nguasani mèh kabèh [[Pulo Jawa]], [[Madura]], [[Bali]], lan laladan liyané ing [[Nusantara]]. Majapait iki karajan gedhé pungkasan singkang nganut agama [[Hindhu]]-[[Buda]] ing Nusantara. Pusat karajan iki ana ing laladan singkang saiki kalebu Kacamatan Trowulan, Majakerta.
== Sajarah ==
Taun [[1292]] [[Singasari]] dikuwasani keturunan [[Krajan Pangjalu|kraton Kediri]] ya iku [[Jayakatwang]]. Salah sawijining keturunan Singasari, [[Raden Wijaya]], sumingkir menyang [[Pulo Madura]]. Ing pulo iku, Wijaya antukolèh pramayoga déning singkang baureksa Madura, ya iku [[Aria Wiraraja]], supaya éthok-éthok ngabdi karo Jayakatwang.
Jayakatwang nampa Wijaya lan kanugrahan lemah ing tlatah Tarik singkang isih awujud alas. Tarik iki dadi cikal bakal kraton Majapait. Ing pungkasan taun [[1293]], Wijaya migunakaké prajurit [[Kubilai Khan]] singkang arep nyerang Singasari ([[Kertanagara]]), gabungané prajurit [[Cina]] karo Wijaya iki bisa ngalahaké Jayakatwang singkang déning prajurit Cina dikira Kertanagara. Raden Wijaya uga ngalahaké prajurit Kubilai Khan wektu acara pista kamenangan musuh Jayakatwang.
