Giotto di Bondone
Giotto di Bondone (udakara 1267–8 Januari 1337), kang lumrahé diapali minangka Giotto iku sawijining pelukis saka Italia lan arsitek saka Firenze . Dhèwèké dianggep kang paling pratama ing barisan para seniman gedhé ing Renaisans Italia.
Giovanni Villani, kang urip ana ing wektu bebarengan karo Giotto, nyerat yèn dhèwèké iku rajané para pelukis, kang bisa nggambaraké citra-citra kaya-kaya citra-citra kuwi urip. Villani mratèlaké, amarga dhèwèké banget pinteré, kutha Firenze wènèh bayaran marang dhèwèké.[1]
Ing abad angka 16, biografer Giorgio Vasari mratèlaké yèn Giotto ngalihaké lukisan saka gagrag Bizantium kang lumrah digawé karo seniman liyané ing jamané dhèwèké, lan nguripaké seni lukisan kang agung kaya kang sabanjuré digawé karo para pelukis Renaisans kaya ta Leonardo da Vinci. Giotto bisa kaya mangkono amarga dhèwèké nggambar citra-citrané saka kauripan sunyata, lan ora njaplak saka gambar-gambar kuna kang uwis misuwur kaya kang ditindakaké seniman Bizantium kaya ta Cimabue lan Duccio.[2]
Karyané Giotto kang paling agung ya iku dékorasiné Scrovegni Chapel ing Padua, kang dirampungake watara taun 1305. Yasané lumrahé diarani "Kapel Arena" amarga iku dumunung ana ing panggonané arena Roman Kuna. Séri lukisan fresko iki nyritakaké bab uripé Maria lan uripé Yesus. Lukisan kuwi dianggep salah sawijining mahakarya saka Renaisans kawitan.[3]
Sanajan Vasari nyerat bab uripé Giotto, ora tau ana kang ngerti pira cacahé saka carita-carita kuwi kang bener kaya kasunyatané, amarga Vasari nyerat kuwi punjul 200 taun sawisé Giotto tinggal donya. Amung ana rong prakara kang diyakini bener. Ing taun 1334, Giotto dipilih déning rad commune Firenze saperlu nggawé pola rancangan menara loncèng ana sacedhaké Katedral Firenze kang rikala kuwi lagi diyasa. Giotto uga kang nglukis "Kapel Arena", nanging ora ana kang ngerti ana ing endi dhèwèké lair, sapa kang tau dadi guruné, kaya ngapa praupané, apa bener dhèwèké kang nglukis lukisan Fresko kang misuwur ana ing Asisi, utawa ana ing endi dhèwèké dikubur.
Rujukan besut
- G.Previtali, Giotto e la sua bottega (1993)
- Giorgio Vasari, Le vite de più eccellenti pittori, scultori e architetti (1568)
- Giorgio Vasari, Lives of the Artists, trans. George Bull, Penguin Classics, (1965) ISBN 0-14-044164-6
- Sarel Eimerl, The World of Giotto, Time-Life Books, (1967), ISBN 0-900658-15-0
Cathetan suku besut
- ↑ Bartlett, Kenneth R. (1992). The Civilization of the Italian Renaissance. Toronto: D.C. Heath and Company. ISBN 0-669-20900-7 (Paperback). Page 37.
- ↑ Giorgio Vasari, Lives of the Artists, trans. George Bull, Penguin Classics, (1965)
- ↑ Hartt, Frederick (1989). Art: a history of painting, sculpture, architecture. Harry N. Abrams. kc. 503–506.