Het Schielandhuis

Het Schielandhuis iku sawijining omah gedhong saka abad kaping 17 ing tengahé Kutha Rotterdam. Dunungé ing dalan Korte Hoogstraat. Omah gedhong iki dibangun antara taun 1662 lan 1665 déning paréntahé Hoogheemraadschap Schieland. Hoogheemraadschap iku wewengkon waterschap utawa badan administrasi sing ana gandhèngané karo kahanan banyu ing Walanda.

Babad besut

 
Het Schielandshuis ing taun 1780

Gedhong sing nduwé nuansa pura kutha iki, bakal dadi dunungé administrasi polder karotengah abad lawasé. Arsitèké iku bokmanawa Pieter Post, sing wis nduwé wewenang sajroning tlatah klasisisme Holland. Pieter Post iku uga tau ndésain Balé kutha Maastricht, Balé timbang Leiden, lan Balé timbang Gouda. Bareng karo Jacob van Campen dhèwèké uga ndésain kedhaton Mauritshuis lan Huis ten Bosch.

Ana tandha-tandha menawa Jacob Lois (ca. 1620-1676), juru cèt biru lan nduwé klangenan minangka arsitèk amatir sing ngrampungaké konsèpé Post.

Reca iki digawé déning juru reca Rotterdam, Pieter Rijcx (1630-1674), sing asliné saka Brugge. Kepriyé crita persisé wis ora bisa ditepungi manèh: nalika ana obongan taun 1864 akèh layang-layang wigati sing ilang kabesmi

Rawuhé Napoleon besut

Kaisar Prancis Napoleon I tau nginep saka tanggal 25 nganti 27 Oktober 1811 ing Schielandshuis, karo garwané Marie Louise lan rombongané. Kusus kanggo prastawa iki, pager wesi sangarepé omah disingkiraké. Alesané déné supaya kréta-krétané ora bisa ngglindhing ing latar ngarep. Banjur lima welas taun sawisé didokoki pager anyar.

Sawetara taun sawisé Tsar Alexander I saka Ruslan ngrawuhi Schielandshuis, panjenengané ora kersa saré ing kamar sing tau disarèni Napoleon.

Museum besut

Ing taun 1841 gedhong iki dituku déning kuthapraja Rotterdam kanggo digawé museum. Nanging wong ora nduwé kolèksi gedhé sing bisa dipamèraké, mula Kutha Utrecht njanjèni menawa sang kolèktor F.J.O. Boymans gelem ngibahaké kolèksiné marang Kutha Rotterdam, menawa jenengé didadèkaké jeneng museum. Mula agé banjur diputusaké mengkono. Ing taun 1849 Museum Boijmans diresmèkaké ing Schielandshuis.

 
Schielandshuis sawisé kobongan tanggal 18 Februari 1864
 
Pandelengan saka sisih (1739)

Ing taun 1864 koleksi lukisan Boijmans mèh kabèh entèk kabesmi nalika kobongan gedhé iku. Ing taun 1867, telung taun sawisé kobongan, gedhong iki dibuka manèh kanggo kaperlon arsip kutha praja lan Museum Boijmans. Rèstorasi museum iki sing dilakoni kurang rapi iki marai pura kutha sing sadurungé apik iki dadi balok watu sing surem lan diplèster pol.

Arsip kutha praja ing Schielandshuis uga ndarbèni kamar antik, sing ngolèksi barang-barang sing dianggep wigati kanggo kutha. Ing taun 1904 Kamar Antik ini diowahi jenengé dadi Museum Purbakala. Karo iki dhasar kanggo Museum Sejarah Rotterdam (Historisch Museum der Stad Rotterdam) dibangun. Saka warisané D.G. van Beuningen (1877-1955) kolèksiné ditambah akèh.

Mawa rong museum sajeroning sagedhong, banjur museum iki kebanjiran kolèksiné. Het Schielandshuis dadi keciliken kanggo rong institut. Mula wiwit taun 1938 Museum Boymans ngalih menyang gedhong anyar (Van der Steurgebouw), sing didunungi nganti saiki minangka Museum Boijmans Van Beuningen.

Nalika iku ana rencana kanggo ngrèstorasi het Schielandhuis. Nanging Perang Donya II lan jaman pambangunan pasca perang marai rencana-rencana iki bubar. Senadyan bangunan iki ora sirna nalika Rotterdam dibom ing Mei 1940, kahanané wis ala banget, nganti disègèl déning brandweer (punggawa pumpa) ing dasawarsa 1960-an.

Ing taun 1978 rad kutha praja Rotterdam mutusaké supaya het Schielandhuis dirèstorasi miturut gagrag gedhong iki ing abad kaping 17. Ing taun 1986 museum iki dibukak mawa pèsta gedhèn. Sawisé iku, gedhong iki olèh tangga sing dhuwur-dhuwur.

Ing tahun 2011 jeneng museum iki diowahi dadi Museum Rotterdam kanggo ndhedhesi menawa téma museum iki yaiku kutha Rotterdam lan dudu mangsa kapungkur waé. Ing taun 2016 Museum Rotterdam ngalih menyang Timmerhuis.

Sawisé pindhahan, ing taun 2017 het Schielandhuis olèh padunung anyar: Rotterdam Partners, Rotterdam Tourist Information, Rad Seni lan Budaya Kutha Rotterdam (Rotterdamse Raad voor Kunst en Cultuur) lan nai010 Uitgevers. Bilik-bilik mangsa (period rooms) sing ana, bisa diséwa kanggo acara kajat lan sapanjuré.

Atlas Van Stolk besut

Atlas Van Stolk iku jenengé kolèksi sing isiné mèh 250.000 gambar kartun, péta, lan gambar ngenani sajarah Walanda. Kolèksi iki diwèhi jeneng miturut sing ngadegaké, yaiku Abraham van Stolk.

Pranala njaba besut