Pekarangan utawa pelataran utawa latar iku aréal lemah ing saubengé omah, kang racaké wujud lemah utawa ditanduri suket utawa diatosaké nganggo semèn utawa bata. Sawetara péranganing pekarangan kerep uga diolah dadi taman utawa kebon kang ditanduri pethètan utawa kembang. Pekarangan uga kerep ditanduri tuwuhan-tuwuhan kang migunani, contoné tuwuhan kang ngasilaké bahan kanggo gawé panganan kaya ta: kaérut lan ganyong ngiras kanggo pager tapel wates pekarangan karo omah. Saliyané iku pekarangan mligi ing karang padésan biyasa ditanduri tuwuhan obat kulawarga utawa kerep dicekak TOGA, minangka apotik hidup. Sing ditandur ing apotik hidup iki antarané tetuwuhan kang biyasa digawé bumbu lan obat, kaya ta: jaé, kencur, temulawak, kunir, blimbing wuluh lan sapanunggalané.

Pekarangan wujud taman.

Pekarangan kang cukup jembar uga kerep dadi papan panggonan dolanan bocah cilik, kaya ta dolanan bal-balan, umbul, benthik, pasaran, bedhil-bedhilan lan sapanunggalané.