Night Train to Lisbon
Night Train to Lisbon iku sawijining filem kang dirilis ing taun 2013. Film iki disutradarani Bille August lan dhedhasar buku roman karangané Pascal Mercier. Filmé antarané dibintangi aktor kondhang Inggris Jeremy Irons.
Sinopsis cekak besut
Sawijining dina, guru basa klasik, Raimund Gregorius mangkat saka omahé menyang sekolahé ing Bern, Switserlan. Ujug-ujug nalika ngliwati kreteg weruh ana wong wadon kang arep mencolot lan nglalu. Wong wadon iku banjur dicekel lan digèrèt medhun nganti ora sida nglalu. Banjur wong wadon iku takon marang Raimund apa olèh mèlu lumaku. Banjur dhèwèké mèlu lumaku menyang kelasé. Raimund banjur wiwit ngajar lan wong wadon iku lungguh mèlu ngrungokaké. Jakèté digantung. Banjur ujug-ujug wong wadoné metu lan lumayu. Dhèwèké dioyak Raimund amarga jakèté ketinggalan lan Raimund samar. Nanging wongé wis ngilang. Ing kanthongé jakèté, Raimund nemu sawijining buku roman abasa Portugis kang ditulis déning Amadeu do Prado. Buku iku prakara rezim diktatorial Salazar lan para pambrontak kang mbaléla nglawan Salazar. Salazar iku diktator fasis Portugal. Sajeroning buku iku ana capé toko buku. Banjur toko buku iku ditekani lan dhèwèké takon kang adol apa kèlingan sapa kang tuku. Tibaké buku iku lagi waé dituku sadina sadurungé. Nalika ndeleng buku iku, ana tikèt sepur tiba. Tikèt iku saka Bern menyang Lisboa, Portugal. Banjur Raimund menyang stasiun, sapa ngerti wong wadon iku ana ing kono. Nanging wong iku ora ketemu banjur Raimund lumebu sepur. Ing Portugal dhèwèké nyoba nggolèki Amadeu do Prado.
Pratélan para paraga besut
- Jeremy Irons minangka Raimund Gregorius
- Mélanie Laurent minangka Estefânia enom
- Jack Huston minangka Amadeu do Prado
- Martina Gedeck minangka Mariana
- Bruno Ganz minangka Jorge O'Kelly tuwa
- Christopher Lee minangka Rama Bartolomeu sepuh
- Lena Olin minangka Estefânia tuwa
- Charlotte Rampling minangka Adriana do Prado tuwa
- Tom Courtenay minangka João Eça tuwa
- Marco d'Almeida minangka João Eça enom
- August Diehl minangka Jorge O'Kelly enom
- Beatriz Batarda minangka Adriana do Prado enom
- Burghart Klaußner minangka Hakim Prado
- Filipe Vargas minangka Rama Bartolomeu enom
- Adriano Luz minangka Rui Luís Mendes, Si Jagal Kutha Lisboa
Kritik lan panampa publik besut
Film iki olèh réaksi kang manéka warna.
David Rooney saka The Hollywood Reporter nulis manawa Billie August olèhé nyutradarani filem iki "panrapané katinggalan jaman ing endi prastawa wigati mèmper kaca buku banget,[1] kamangka Boyd van Hoeij saka kalawarti Variety ngarani filem iki sawijining "relik", dialogé bisik-bisikan lan ora akèh omongané. Saliyané iku filem iki ora tegang babar belas[2]
Cathetan suku besut
- ↑ "Night Train to Lisbon: Berlin Review". The Hollywood Reporter. Dibukak ing February 13, 2013.
- ↑ "'Night Train to Lisbon' review". Variety. Dibukak ing February 13, 2013.