Nikujaga
Nikujaga (肉じゃが daging kentang?) inggih punika dhaharan masakan Jepang ingkang dipundamel saking daging, kentang lan bawang bombay ingkang dipungodhog supados raosipun legi kaliyan gula, kecap asin, lan ugi mirin.[1] Wonten ing Jepang sisih kilen, daging ingkang dipunginakaken inggih punika daging sapi kaliyan kentang ingkang jinis Mayqueen. Wondene wonten ing Jepang sisih wetan punika ngginakaken daging babi[2] kaliyan kentang ingkang jinis Danshaku. Nikujaga punika asalipun saking masakan ingkang dipungodhog ingkang dangu, daging ingkang dipuncawisaken déning angkatan Laut Kerajaan Inggris. Dhaharan punika gadhah kandhutan gizi ingkang seimbang satemah dhaharan punika dipundadosaken dhaharan wonten ing angkatan Laut Jepang lan sansaya nyebar ing kalanganipun rakyat Jepang.
.jpg)
Asal usul
besutNalika nembe ngangsu kawruh wonten ing Portsmouth, Inggris (1870-1878), Togo Heihachiro[1] punika remen sanget kaliyan dhaharan ingkang sinebat beef stew inggih punika daging sapi ingkang dipungodhog dangu. Saksampunipun kondur malih dhateng Jepang, dhaharan kalawau dados dhaharan standar wonten ing saknginggilipun kapal. Juru masak ingkang dipunparingi dhawuh supados damel dhaharan kasebut boten mangertos resepipun, menapa malih saus demiglace lan anggur (unjukan) punika nggih boten wonten. Gula saha kecap asin punika lajeng dipundadosaken bumbu lan asilipun malah raosipun echo. Masakan punika lajeng dados menu angkatan laut, nanging boten kondhang dipundhahar déning kalangan rakyat amargi dipundamel saking daging lan kentang ingkang boten limrah dipundhahar déning tiyang Jepang. Nikujaga punika naté badhe dipunlalekaken déning tiyang amargi pagesangan ingkang abot saksampunipun Perang Dunia II. Nalika wonten ing tengahing dekade 1950-an, Nikujaga punika mlebet malih wonten ing menu masakan, nanging nembe dados menu padintenan punika wonten ing saktengahing dekade 1960-an.
Nikujaga lan Kareraisu (nasi kasi) punika kalebet salah satunggaling tuladha "masakan mama" (ofukuro no aji) ingkang ngemutaken tiyang Jepang dhateng masakanipun ibu nalika ingkang putra punika tasih alit. Ibu-ibu wonten ing Jepang limrahipun gadhah resep lan cara masak Nikujaga ingkang unik, satemah ingkang putra limrahipun boten bakal kesupen marang raosipun masakan ibu.