Protoplanèt

Protoplanèt iku planit kanthi ukuran kaya déné rembulan, utawa embrio planit sing ukurané luwih gedhé, sing ana sajeroning cakram protoplanèt. Dhèwèké dianggep kadhapur saka planètisimal kanthi ukuran sapérangan kilomèter, sing kanthi gravitasi silih tarik lan tabrakan. Miturut téyori pambentukan planit, orbit-orbit protoplanèt sithik silih potong antarané siji lan liyané saéngga dumadi tabrakan kanthi dhampak gedhé lan sabanjuré kanthi matahap mbentuk planit-planit sing dhominan.

4 Vesta, sawijining protoplanèt sing isih urip.

Sajeroning kasus Tata Surya, diprakirakaké yèn tabrakan antar planètisimal nyiptakaké sapérangan atus embrio planit. Embrio mau mèmper karo Pluto, kanthi massa watara 10²² tekan 10²³ kg lan dhiameter sapérangan èwu kilomèter. Sakwéné watara 100 Ma dhèwèké kalibat tabrakan kanthi dhampak gedhé antarané siji lan liyané. Kedadéyan sing cetha ngenani kepriyé embrio-embrio planit silih tabrakan kanggo mbentuk planit ora dikawruhi, nanging diprakirakaké yèn tabrakan awal bakal gawé embrio "génerasi" pisanan digantèkaké déning embrio génerasi kaloro, sing gunggungé luwih sithik nanging ukurané luwih gedhé. Ing gilirané tabrakan sabanjuré bakal nyiptakaké génerasi katelu sing luwih sithik manèh nanging kanthi ukuran luwih gedhé saka embrio sadurungé. Akiré mung bakal katinggal saglintir embrio sing kasisa, sing banjur silih tabrakan lan akiré mbentuk kumpulan planit-planit sing sabeneré.