Richard Oh

Richard Oh (lair ing Tebingtinggi, Sumatera Lor, 30 Oktober 1959; umur 64 taun) yaiku tokoh sastra lan sastrawan saka Indonésia. Dhèwèké bebarengan karo Takeshi Ichiki ngrintis ngadegaké Kusala Sastra Khatulistiwa, sawijiné pangaji ing babagan kasusastran kanggoné para sastrawan Indonésia kang duwèni prèstasi. Richard nganggit pakaryané awujud novèl. Jenengé uga kondhang ing babagan pafileman Indonésia. Dhèwèké ngarahaké salah siji film yaiku The Lost Suitcase ing taun 2006.

Richard Oh

Latar wuri

Richard Oh lair ing Tebingtinggi, provinsi Sumatera Lor, tanggal 30 Oktober 1959. Awit ésih nom, dhèwèké wis cedhak karo donyanè kasusastran, nalika sekolah ing desané. Rikala semana, Richard seneng maca buku-buku sastra lan komik gadhah bapakné. Amarga gedhené penggayuhé, pungkasané ndadèkké Richard pindhah ing Jakarta. Awit saka kuwi, dhèwèké nepang marang donyané kasusastran lumantar pakaryané Joseph Conrad, kang nemu kaéndahane basa lan sastra Inggris, lan péngin mumpuni ing babagan iku. Ing umuré 17 taun, Richard mèlu adon-adon panulisan carita cekak kang dianakaké déning kalawarta Asiaweek. Sanadyan ora mimpang, carita cekaké kasil nampa bebungah.

Kanggo nyembadani gegayuhané kuwi, Richard sinau panulisan kreatif ing Universitas Wisconsin, Madison, lan UC Berkeley, Amérikah Sarékat. Bab iki, tamtu waé agawé keluargané kaget, amarga lumrahé wong péngin sekolah menyang Amérikah Sarékat njupuk jurusan manajemen, marketing, utawa keuangan. Sadurungé dhèwèké ngalami depresi, rumangsa ora populèr, banjur dadi muyab. Richard Oh uga naté ngangsu kawruh marang Lorrie Moore, panganggit buku kang lumebu nominasi National Book Award. Kepèpèt déning kulawarga kang ngukur kasuksèsan saka bandha donya, samulihé saka Amérikah Sarékat, Richard nyambut gawé ing perusahaan pariwara, kangmangka péngin ésih banget nulis.

Tragèdhi Mèi 1998 dadi titik balik ing kauripan Richard Oh kanggo bali penggayuh sadurungé: nulis. Kadadéan kang diwernani anané pangobongan lan rudapeksa tumrap warga ètnis Tionghoa ndadèkaké rasa kang mataun-taun kapendhem banjur "mbledhos". Dumadakan Richard bisa kanthi lanyah nulis novèl. Dhèwèké nulis bab salah sijiné golongan wong turunan lan pribumi makarya bebarengan nanging tansah disujani déning pamarintah. Sabanjuré, novèl kapindho ditulis ing kaanan angèl, jalaran kagiyatane ngemunah toko bukuné.

Prihatin tumrap kaanan buku-buku sastra Indonésia kang kurang payu, dhèwèké ngadegaké perusahaan penerbit Metafora, Jurnal Prosa, Jakarta Review Book kanggo nggramang kaum ekspatriat kang kurang paham kahanané kasusastran Indonésia. Lan minangka ngangkat mulyané kasusastran Indonésia, Richard ngrintis Kusala Sastra Khatulistiwa (sadurungé dijenengi Khatulistiwa Literary Award) bareng karo Takeshi Ichiki ing taun 2001, kanthi bebungah Rp. 30.000.000, lan wiwit taun 2002 diunggahké dadi Rp 50.000.000.

Pakaryané

• Pathfinders of Love (1999)
• Heart of The Night (2000)
• The Rainmaker’s Daughter (2004)

Filmografi

• The Moon Cake Story (2017) - minangka paraga pandhukung
• My Stupid Boss (2016) - minangka paraga pandhukung
• Sundul Gan: the Story of Kaskus (2016) - minangka paraga
• Terpana (2016) - minangka sutradara
• Terpana (2016) - minangka panganggit skénario
• Terpana (2016) - minangka juru gawé
• Melancholy is a Movement (2015) - minangka sutradara
• Melancholy is a Movement (2015) - minangka panganggit skénario
• 3 Dara (2015) - minangka paraga pandhukung
• Description Without Place (2011) - minangka panganggit skénario, juru gawé, lan sutradara
• Cinta Setaman (2008) - minangka paraga
• Cinta Setaman (2008) - minangka cameo
• Koper (2006) - minangka sutradara, panganggit skénario, lan juru gawé

Deleng Uga

• Kusala Sastra Khatulistiwa

Pranala njaba

• Website pribadi Richard Oh Archived 2017-04-26 at the Wayback Machine.