Wikipédia:Artikel pethingan/Slot/Balèt Ramayana Prambanan

Pagelaran binuka balèt Ramayana Prambanan kang ginelar saka sasi Mèi tekan Oktober.
Pagelaran binuka balèt Ramayana Prambanan kang ginelar saka sasi Mèi tekan Oktober.

Balèt Ramayana Prambanan iku tontonan kang nggabungaké jogèd lan sandiwara tanpa pacelathon, ingusung saka carita Ramayana lan ginelar ing cedhak Candhi Prambanan ing Pulo Jawa, Indonésia. Balèt Ramayana Prambanan minangka balèt kang ajeg dhéwé mitontonaké balèt Ramayana wiwit taun 1961. Pamilihé wujud balèt kanggo mitontonaké wiracarita Ramayana iku amarga balèt nengenaké obahing awak kanggo mahyakaké surasa, tanpa pacelathon, mula ingajab bisa dingertèni para kang nonton saka manéka latar wuri budaya lan basa. Carita Ramayana isi bab lelakoné Rama nylametaké Sinta kang dibedhog ratu Alengka, ya iku Rahwana. Gagrag balèt Ramayana Prambanan iku ana cacah telu, ya iku gagrag Prambanan, Surakarta, lan Ngayogyakarta kang sumberé saka ciri obahan ing wayang wong. Balèt Ramayana Prambanan lumrah kagelar saben dina Slasa, Kemis, lan Setu. Gelaran ing pagelaran binuka mung ing mangsa katiga. Kajaba iku, gelaran katindakaké ing pagelaran tinutup. (Waca candhaké)