Wrettasancaya mawi sekar

Wrettasancaya mawi sekar inggih menika serat padamelanipun Empu Tanakung ingkang wosipun piwulang mawi dhapukan sekar ageng.  Panyerating serat menika boten sumerep ing jamanipun ratu Jawi sinten kémawon. Ananging serat menika kaserat nalika jaman Kedhiri pungkasan. Ing salebetipun serat kasebat dipunsukani tuladha cacahipun 94 kados déné serat Candrakarana. Ing serat menika pérangan piwulang dipuncaosi ular-ular cariyos. Déné ular-ularipun cariyos ngandharaken tiyang èstri ingkang dipuntilar tindak déning garwa kakungipun. Tiyang èstri kasebat lajeng tindak ing satunggaling taman lan kepanggih mliwis sajodho. Mliwis kalawau dipunsuwuni pitulungan kanggé madosi garwa kakungipun.

Serat wrettasancaya menika sampun naté dipuncithak déning Prof. H. Kern nalika taun 1875, kanthi angginakaken aksara Jawa saha pratelan basa Walandi. Lajeng dipuncithak malih wonten ing Verspreide Geschriften, kalebet ing deel IX, kaca 67, ananging seratanipun dipunsantuni kaliyan seratan aksara Latin.