Among-among

Among-among ya iku tradhisi kanggo mengeti utawa pangéling-éling dina kalairan miturut tanggalan Jawa. Among-among saka tembung ‘pamomong’ tegesé ngemong. Among-among digawé 35 dina pisan utawa selapan. Ing tanggalan Jawa 5 dina pasar ya iku Legi, Pahing, Pon, Wagé, lan Kliwon. Tradhisi iki wujud sukur wong tuwa kanggo anaké. Latar wuri tradisi iki ya iku kabudayan Jawa kang isih kenthel kang ancasé kanggo ngéling-éling dina kalairan anak supaya séhat. Tradhisi iki uga wujud sukur marang Gusti Allah.

Among-among biasané dilakoni kanthi bancakan ya iku bocah-bocah lungguh ngubengi baki kang isiné sega, gudangan, gereh pèthèk, lan endog. Sawisé kuwi bocah-bocah padha donga bebarengan banjur mangan among-among bebarengan.

Teges saka tradhisi among-among ya iku prasaja, kang didelok saka bocah-bocah kang gelem mangan among-amongan. Bocah-bocah kang beberengan mangan among-among nuduhaké rasa preduli, ya iku ménéhi panganan marang wong liya.

Ubarampé

Ubarampé sing dianggo ing upacara iki ya iku:

1. Gudangan, isiné kacang dawa, bayem, kobis, thokolan, lan wortel banjur dicampur parutan krambil supaya rasané gurih. Teges saka gudangan yaiku simbol kesuburan supaya olèh rejeki kang akèh.
2. Jangan kluwih, duwèni teges njaluk mring Gusti Allah supaya diwènèhi rejeki kang akèh.
3. Banyu putih, pralambang kasucèn. Didelok saka warna putih utawa bening mènèhi gambaran kang resik saka reregetan. Banyu putih didongani lan ditujokaké marang Gusti Allah.
4. Tukon pasar, pralambang manéka warna isiné pasar. Ing among-among tukon pasar isiné slondok, kacang, gedhang, apem, lan bengkoang
5. Gerèh pèthèk pralambang kacukupan asilé sagara.
6. Thon-tho, pralambang tékad manungsa kang kuat.
7. Jenang, jenang kang digunaaké ana 2 warna ya iku jenang abang lan jenang baro-baro. Jenang abang ya iku jenang sing diwènèhi tambahan gula jawa. Jenang iki pralambang wong wadon utawa ibu utawa getih. Jenang baro-baro ya iku saka tembung babaré wong loro tegesé manungsa lair saka bapak lan ibu. Jenang baro-baro disuguhaké ana ing sakpiring yaiku jenang putih lan jenang abang.
8. Tumpeng/sega putih. Tumpeng duwéni pralambang urip lan mati manungsa duwéné Gusti Allah. Didelok saka wujudé kang gedhé ing ngisor lan kerucut cilik ing bagian dhuwur digambaraké kahanan manungsa karo Gusti Allah.