Ékaristi

Bujana Suci (komuni) utawi Sakramèn Ékaristi (saking basa Yunani Ευχαριστία eucharistia) punika salah satunggilipun sakramèn ingkang dipunsumerepi ing salebeting Gréja Kristen. Istilah ekaristi ingkang asalipun saking basa Yunani ευχαριστω, ingkang ateges raos matur nuwun utawi bingah, langkung asring dipun-ginakaken déning gréja Katulik, Anglikan, Ortodoks Wétan, lan Lutheran, éwadéné istilah Bujana Suci dipun-ginakaken déning gréja Protèstan. Bujana Suci dipunlandhesi déning Dhahar ndalu pungkasan Yesus kaliyan murid-muridipun ing ndalu sadèrèngipun panjenenganipun dipuncipeng lan dipunsalibaken (Markus 14:12-21. dll.).

Makna Bujana Suci

Umumipun tiyang Kristen pitados bilih dipunprintahaken déning Yesus supados ngayahi prastawa bujana puniki kanggé mèngeti ("... tindakna minangka pengéling-éling marang Aku!" - 1 Kor. 11:24, 25). Nanging sawatawis aliran Gréja Kristen gadhah pangertosan ingkang bènten-bènten ugi bab sakramen punika. Gréja Katulik Roma nandhesaken makna bujana suci minangka sarana kasalametan kanggé umat. Gréja-gréja Protèstan limrahipun langkung nandhesaken bujana minangka pepènget dhumateng sédanipun lan pangurbanan Yesus kanggé umat manungsa.

Elemen Bujana

Kadosdéné wonten ing bujana Yesus ingkang pungkasan, umat Kristen sesarengan dhahar roti lan ngunjuk anggur. Wonten ing bab punika ugi wonten bédanipun ing salebeting praktèk miturut tradhisi gréja. Ing kalangan Gréja Katulik Roma roti ingkang dipun-ginakaken dipundamel mligi tanpa ragi (hosti), sementawis anggur boten dipunparingaken dhumateng umat. Ing kalangan Gréja Protèstan dipun-ginakaken roti biyasa, sementawis anggur ingkang dipun-ginakaken saged ugi wujud jus anggur.

Mugi mirsani

Pranala njawi

Sakramèn Ekaristi Archived 2012-05-04 at the Wayback Machine.