Hayatudin

Hayatudin (lair ning Lampung kidul, 17 Juni 1972) iku seniman lukis sing biyèn sinau ning Institut Seni Indonesia (ISI) Jogja. Hayatudin uwis bola-bali nampa pangaji ing seni rupa, pangaji kuwi kaya ta skètsa lan akrilik jempolan FSR ISI Jogja, nominator ing Affandi Prize, Juros Choice Asean Art Award Singapore (2000), Indofood Art Award, lan dadi finalis Philip Morris Asean Award ping télu (1977, 1999, lan 2000). Hayatudin wis ping pindho gawé paméran tunggal ya iku Survivor (taun 2006 ing Bentara Budaya Yogyakarta) lan Kota Tanpa Nama (taun 2009 ing Semarang Gallery).

Karya

Hayatudin duwé ciri sing béda saka seniman liyané, dhèwèké seneng molahaké rupa utawa warna, iki dadi kaluwihan saka karyané dhèwèké. Hayatudin mawas rupa luwih apik saka seniman liyané. Kaluwihan Hayatudin kuwi kaya sing diomongké David Batchelor, rupa kuwi minangka punjeré seni, isa nggawé angen-angen sing nonton dadi urip. Rupa kuwi dadi sing baku ing seni lukis, kaya ta lairé imprésionisme minangka pucuk saka cahya karo rupa sing dadi tetimbangané seniman.

Ciri kuwi mau uga kétok ing pamèrané Hayatudin sing kaloro, Kota Tanpa Nama. Pamèran iki Hayatudin ngepyakaké limolas karya lukis nganggo cat akrilik ing kanvas minangka awujud carita sing dadi siji. Hayatudin kepéngin carita saka limolas karyané iki dadi carita sing siji lan tunggal. Paméran Kota Tanpa Nama iku ngangkat irah-irahan bab kutha sing dinamis, bisa saya gedhé bisa saya orod. Karya iki éntuk wewengan saka novèl Invisible Cities karyané Italo Calvino sing nggambaraké kutha sing ora ana uwongé. Kurator seni, Rifky Effendy, ngomong yen Hayatudin bokmanawa arep nganggo prinsip optical art ing karyané. Optical artutawa Op Art iki dianggo karebèn karyané Hayatudin iki dadi katon ora lumrah.