Keputrèn Pura Mangkunegaran

Keputèn Pura Mangkunegaran punika salah satunggaling yasa ingkang wonten ing Pura Mangkunegaran. Kajawi Keputrèn, ing Pura Mangkunegaran ugi wonten Pamedan, Pendhapa, Pringgitan, Ndalem Ageng, lan Pracimayasa. Pura Mangkunegaran punika kabangun sasampunipun dipunleksanakaken Prajanjèn Salatiga ingkang dipuntapakasmani dening Sunan Pakubuwana III kaliyan Raden Mas Said ing Salatiga, 17 Maret 1757.

Perangan ing Yasa Keputrèn

Kolam ing satengahipun Keputrèn Pura Mangkunegaran

Keputrèn punika papan ingkang dipunlenggahi dening brayat Mangkunegaran, mliginipun kagem para pawestri. Ananging wiwit taun 1968 brayat Gusti Sura manggen ing yasa Keputran lan Keputrèn punika dipunbikak kangge masarakat ingkang sowan ing Pura Mangkunegaran. Tiyang-tiyang ingkang badhe mlebet ing Keputrèn kedah dipunrencangi abdi dalem miyos saking kori kilen Dalem Ageng utawi Pringgitan.

Ingkang dados ciri yasa Keputrèn inggih menika ing saben pojokan wonten kaca pangilon. Kejawi kaca pangilon, ing Keputrèn kathah foto brayat ageng adipati Mangkunegara kados ta Gusti Pangeran Haryo Bhre Cakrahutomo Wira Sudjiwo, Gusti Raden Ajeng Ancilla Sura Sudjiwo, Gusti Pangeran Haryo Paundrakarna Sukmaputra Jiwanegara/Gusti Pangeran Haryo Paundrakarna Jiwo Suryonegoro, lan GRAy Putri Agung Suniwati utawi Menur.

Ing yasa Keputrèn wonten kamar ageng lan kamar alit, pondhokan kagem nampi dhayoh, pondhokan kagem dhahar, patamanan ingkang endah amargi wonten taneman lan mawerni-werni sekar saha patung klasik mawi gaya Eropa, sarta kolam ing sacelakipun pondhokan kagem dhahar.

Kamar ing Keputrèn wonten kalih jinis: kamar ageng ingkang nggadhahi kalih jendela lan kamar alit ingkang namung nggadhahi setunggal jendela.

Ing Keputrèn wonten kalih pondhokan kagem dhahar brayat ageng adipati Mangkunegara lan kagem njamu dhayoh agung. Ing pondhokan punika wonten meja kursi kagem dhahar enjing, siyang, kaliyan dalu. Papan ingkang diagem dhahar dalu wonteng ing pondhok sisih kilen pojok. Ornamen ingkang kathah dipunagem ing pondhokan punika corakipun khas Bali amargi Pura Mangkunegaran punika nggadhahi sesambetan kaliyan Kraton Karangasem Bali. Langit-langit pondhokan punika saking kaca pangilon. Kejawi supados katingal endah, maringi kesan wiyar, kaca pangilon punika inggih kangge ninggali kawontenan ing pondhok dhahar Mangkunagara X.

Pondhokan sanèsipun inggih kangge toko suvenir lan kamar kangge para dhayoh agung Mangkunagara. Kamar-kamar kasebat nggadhahi kori sesambetan kaliyan kamar sanèsipun. Gunggungipun kamar boten wonten 20.