Khoirul Soleh

Khoirul Soleh (1968) inggih menika salah sawijining sastrawan ingkang miyos ing Boyolali, 22 Juli 1968. Ingkang rama asmanipun Harno Budianto suwargi lan ingkang ibu asmanipun Sumarti. Khoirul Soleh miwiti pawiyatanipun wonten SD N 1 Donohudan, Ngemplak, Boyolali. Tumunten panjenenganipun nglajengaken pawiyatanipun wonten SLTP N 2 Colomadu, Karanganyar lan wonten ing SMA N 4 Surakarta. Pawiyatan ingkang pungkasan inggih menika wonten Jurusan Sastra Daerah S1 Fakultas Sastra UNS dumugi warsa 1993. Awit kalebet dados mahasiswa Jurusan Sastra Daerah menika panjenenganipun miwiti kalangenanipun nyerat karya sastra dugi samangke. Panjenenganipun kagungan garwa kanthi asma Tini K. S. ingkang peputra cacahipun kalih, asmanipun Lintang Wistu Malindi lan Bintang Alit Nugara. Samenika panjenenganipun mapan wonten Brogo RT 02/IV, Donohudan, Ngemplak, Boyolali, 57375.

Minangka sastrawan, Khoirul Soleh angripta karya sastra kados ta geguritan, cerkak, roman sejarah, lan artikel ingkang gunggungipun dumugi 500-an. Karya sastra ingkang dipun kasilaken sampun kababar wonten kala warti lan majalah tuladhanipun Panakawan, Jawa Anyar, Solo Pos, Pos Kita (Solo), Simponi, Swadesi (Jakarta), Surabaya Post, Karya Darma, Panjebar Semangat, Jaya Baya (Surabaya), Mitra Bandung (Bandung), Minggu Pagi, Pagagan, Kedaulatan Rakyat (Yogyakarta), Suara Merdeka, Wawasan, Pustaka Candra, Krida Wiyata, Bahari, lan Desa Kita (Semarang).

Karyanipun ingkang arupi cerkak antawisipun kanthi irah-irahan Penari, Plinthi, Kentrung, Sumilire Angin Esuk, Kasetyan, Abote Sesanggan, lan sapanunggalanipun. Dene ingkang arupi roman sejarah, irah-irahanipun Geger Sukowati, Jaka Kandhung, Suling Ajaib, Klebu Wuwu, lan sapiturutipun. Wonten ugi cariyos pewayangan ingkang dipunripta kados ta Lelananging Jagad, Silir Solo, lan sanesipun.