Mangliawan

Mangliawan (Malyawan) iku putrane Prabu Sukesa, ratu kang kadhatone ing akasa. Mangliawan nduwé adhi 2, jenenge Mali, lan Sumali.

Miturut layang Uttarakanda, madege kadhaton Ngalengka iku ing jamané danawaraja 3 tunggal rama-ibu, yaiku Malyawan, Mali, lan Sumali. Sing yasa (gawe) kadhaton Ngalengka iku Bathara Wiswakarma, dewa kang ahli ing babagan bangunan, saka panyuwune danawaraja 3 iku.

Kadhaton Ngalengka sawijining kadhaton emas pinatik manik mawa retna, ambane 30 yojana (1 yojana=112 Km). Dumunung ing pucuking Gunung Trikuta, sapinggiring Daksinasagara (samodra kidul, maksude samodra ing sakiduling Indhi), ing sacedhake Gunung Parwata.

Mangliawan iku digdaya banget. Awake ora tedhas ditamani landheping gegaman wujud apa wae, watake angkara murka. Mula banjur ada-ada arep nguwasani kahyangan (papane para dewa). Mali ngombyongi, dene Sumali rangu-rangu. Kinarya dhadhakaning prakara, Mangliawan utusan Patih Lodra supaya nyaosake layang marang ratuning para dewa, nglamar Dewi Sri Kembang garwane Bathara Wisnu.

Bathara Guru ora minangkani panyuwune Mangliawan. Layang disebit-sebit, diuncalake ing raine Patih Lodra. Sang Patih banjur bali ing Ngalengka, ngaturake cabaring laku.

Mangliawan banjur ngirid wadyabala nglurugi kahyangan. Dadi perang rame. Jroning paprangan 3 dina, rerenggan kahyangan akeh sing rusak. Bathara Wisnu sigra gawe rekadaya. Dewi Sri (garwane) didhawuhi mikat lan nemoni Mangliawan, golek sisik mêlik papan pengapesane.

Mangliawan bareng weruh kasulistyane Dewi Sri, sanalika gandrung-gandrung. Dewi Sri matur saguh kagarwa, nanging darbe panjaluk kepengin ngerti dununge kasektene Mangliawan. Rehne kadhung wuyung, panjaluke Dewi Sri dituruti, dikandakake yen wadi kasektene iku dumunung ing poking kuping tengen kang belang putih sing gedhéné saendhoge manuk emprit.

Bathara Wisnu sing ngawat-awati Dewi Sri kanthi laku kadewatan, wis mireng ucape Mangliawan. Sigra nglepasaké senjata Cakra tumanduk ing kupinge tengen Mangliawan kang ana belange putih. Mangliawan sirna margalayu. Ragane kontal tiba ing bumi, dadi gunung, ingaran Gunung Mangliawan. Mali bela pati. Diuntapake sisan dening Bathara Wisnu. Sumali weruh kadang-kadange mati, sigra oncat saka paprangan, ndhelik ing Gunung Trikuta. Sawatara taun kadhaton Ngalengka komplang. Sawise rinasa aman, Sumali bali ing Ngalengka lan jumeneng ratu, jejuluk Prabu Sumali.

Mangliawan ninggalake anak 1, jenenge Jambumangli. Jambumangli diopeni Sumali. Ing tembé didadekake senapati ing Ngalengka.