Parembugan:Buwana

Buwana

Miturut kalih bausastra ingkang kula tuwèni, bawana punika tegesipun:

• bawana : (S) kw. 1 omah, panggonan; 2 jagat; kc. buwana (Poerwadarminta, 1939)
• bawana : variant of buwana (Robson, Wibisono; 2002)

Déné buwana tegesipun:

• buwana : (S) kw. 1 jagat; 2 tanah kang jěmbar; gawe [x] balik pr: ngraman (Poerwadarminta, 1939)
• buwana : 1 continent, 2 (literary) world, 3 universe (Robson, Wibisono; 2002)

Saking bausastra kekalihipun, tembung buwana langkung trep minangka padanan saking continent utawa benua. Cahyo Ramadhani ^pirembagan 14 November 2015 23.20 (UTC)

Matur nuwun Mas, kula sarujuk kémawon. Meursault2004^ngobrol 14 November 2015 23.31 (UTC)

Kula radi gumun sayektinipun, kok miturut Robson lan Wibisono, suraos kapindhah buwana punika continent. Punika adhedhasar punapa ... Kamangka miturut OJED (Zoetmulder lan Robson) bhuwana punika tegesipun the world, the earth. Nanging bausastra punika (Robson & Wibisono) saged kaanggep baku, dados ndhèrèk kémawon. Meursault2004^ngobrol 14 November 2015 23.57 (UTC)

Inggih, Pak. Kula kirangan punika. Nanging katingalipun tembung buwana panci sampun naté dipigunakaké kanggé nyebataken dhataran kadosta Asiah lan Éropah.

1. nanging kita nama badhe sagêd nguruni katêntrêman sarta rahayunipun ing jagad sadaya, kalêbêt ing buwana Asiah sarta Eropah ingkang sawêg nandhang rêtuning jagad. (Narpawandawa Surakarta, 1937)
2. Kangjêng Pangeran Angabèi, punika inggih badhe têdhak dhatêng Eropah, sabab kêpengin pirsa kawontênanipun ing buwana Eropah. (Pusaka Jawi, 1924)
3. Sêsambêtanipun Indhonesia kalihan Europa nama kantun sakêdhik, gêntos sêsambêtan kalihan nagari-nagari ing Asia tuwn buwana Amerika. (Mardi Siwi, 1940)

Tembung bawana ugi wonten cathetanipun:

• Eropah, panggenanipun bôngsa kulit pêthak, ingkang sisih wetan, bawana Asiyah, panggenanipun bôngsa kulit jêne, sisih kidul bawana Aprikah, panggenanipun bôngsa kulit cêmêng, dene sisih kilèn toyaning Sagantên Têngah tumêmpur dhatêng toyaning samodra gung Atlanti (Atlantischê Ocêaan) wontên sasêlaning antawis badhe gathukipun poncot bawana Eropah ingkang kidul kilèn, kalihan bawana Aprikah ingkang lèr kilèn. (Kêkesahan dhatêng Nagari Walandi, 1916)

Dados, inggih sajatosipun panci dèrèng konsistèn kawit rumiyin. Kula sami sarujuk buwana mawon supados konsistèn. Cahyo Ramadhani ^pirembagan 15 November 2015 01.08 (UTC)

Inggih mangga. Meursault2004^ngobrol 15 November 2015 02.18 (UTC)

Wonten mriki, malahan buwana dienggé mertal nami Walandi Middellandsche Zee, dados "Sagantên Têngah utawi Sagantên Madya Bawana". Tembung Madya-Bawana punika sami kaliyan tegesipun wikt:Mediterranean. Padhanan benua sayektinipun ing basa Jawi Kina punika rak wanwa, dados "wano" utawi "wanu" ing Basa Jawi Énggal. Nanging ing Basa Jawi tegesipun namung dhusun. Meursault2004^ngobrol 15 November 2015 02.18 (UTC)