Prabu Japaran
Artikel iki tanpa rujukan sing mitayani mula isèné ora bisa divèrifikasi. Sampéyan bisa mbiyantu  kanthi nambah rujukan sing trep.Artikel sing ora bisa divèrifikasi bisa dibusak kapan waé déning panata. |
Prabu Japaran iku ratu ing Hindhi (Hindhustan), tetunggule para ratu sakiwa tengene negara Hindhi. Kratone dumunung ing hima. Duwé sesembahan wujude sapi kang aran Lembu Andini kang dumunung ing sakidul wetane Gunung Tengguru kang kawastanan Gunung Himalaya. Wondene, Lembu Andini kang disembah-sembah iku anake Jin Rohpatanam, duwe kadigdayan linuwih lan bisa tata jalma.
Sawijining dina, ambarengi wiwitaning taun, Prabu Japaran lan para ratu andhahane padha munggah menyang gunung padunungane Lembu Andini. Padha nganggo busana kang edi peni, beboreh lenga wangi, nggawa sesaji kanggo sedekah anggone arep ngabekti marang pangerane kang wujud lembu.
Kacarita, Sang Hyang Manikmaya (Bathara Guru) kang makahyangan ing Jonggringsaloka, kang dununge ing pucuking Gunung Tengguru, priksa dhampyak-dhampyak lakune Prabu Japaran kang ngirid para ratu sawadyabalane. Ing batos wus datan kasamaran yen ratu ing Hindhi sarombongan iku nedya ngabekti marang sesembahane. Bathara Guru enggal-enggal menyang padunungane Lembu Andini, lenggah ing gigire Lembu Andini.
Prabu Japaran lan para ratu andhahane bareng priksa yen pangeran sesembahane ditumpaki dening manungsa, padha kamitenggengen dening bangeting gumune, awit ora nyana babar pisan yen sesembahane bisa ditumpaki dening manungsa.
Lembu Andini ngerti lan bisa ngrasakake kaya ngapa cuwane ati Prabu Japaran lan para ratu andhahane. Mula gage ngucap, "He Sang Prabu Japaran lan para ratu kabeh, aja ana kang kleru tampa. Wruhanira kang nitih ing gigiringsun iki, kang satuhune Pangeraning jagad. Ingsun iki mung ngembani bae. Mula, sira sawadyabalanira gage padha manembaha marang panjenengane."
Senadyan wis didhawuhi Lembu Andini nganti rambah kaping telu, nanging Prabu Japaran lan para ratu andhahane isih padha mangu-mangu, durung ana kang gelem manembah marang Bathara Guru. Awit saka iku, Bathara Guru nuli mateg Pengabaran. Bareng ketaman Kemayan, Prabu Japaran lan para ratu andhahane padha ndhrodhog wel-welan tanpa daya. Satemah banjur padha mratobat lan gelem manembah marang Bathara Guru.
Sawise Prabu Japaran lan para ratu sawadyabalane padha ngidhep marang Bathara Guru kaya dhawuhe Lembu Andini, Bathara Guru banjur kondur ing kahyangane kanthi nitih Lembu Andini.