Prabu Mahesasura
Prabu Mahesasura iku ratu ing Guwa Kiskendha. Wujude buta sirah mahesa (kebo). Kasektene pilih tandhing. Patihe wujud buta sirah sapi, jenenge Patih Lembusura. Titihane (tunggangane) wujud banthèng sirah buta, jenenge Jathasura.
Wadyabala Guwa Kiskendha cacahe ewon, kabeh wujud buta. Senapatine wadyabala ana 5, yaiku:
- Kala Sardula, buta sirah singa
- Ditya Singadarpa, buta sirah macan
- Ditya Kunjara, buta sirah gajah
- Ditya Wirupegsa, buta sirah garudha
- Ditya Sonadarga, buta sirah asu.
Sawijining dina Prabu Mahesasura utusan patihe supaya menyang kahyangan, nglamar widadari kahyangan kang jenenge Dewi Tara. Wanti-wanti dhawuhe sang prabu, aja nganti bali nglenthung, bali kudu éntuk gawe. Mula Ki Patih dikeparengake nganthi wadyabala sagelar sapapan.
Tekan kahyangan, mbarengi Bathara Guru pinuju siniwaka. Nalika didangu, ngaku jeneng Patih Lembusura, patihe Prabu Mahesasura ing Guwa Kiskendha. Dinuta ratu sesembahane supaya ngaturake nawala panglamar. Sawisé layang ditampa déning Bathara Guru, Patih Lembusura kadhawuhan ngenteni ing Repat kepanasan, yaiku alun-alun ing Kahyangan Jonggringsalaka.
Sapungkure Patih Lembusura, Bathara Guru dhawuh marang Bathara Brama lan Bathara Indra supaya mbalekake utusan saka Guwa Kiskendha. Wis dadi paugeran yen raseksa jodhone kudu raseksi. Ora kena buta nggayuh widadari. Dewa loro iku nuli manggihi Patih Lembusura, ngendika kang wose panglamare Prabu Mahesasura ora ditampa.
Patih Lembusura muring, satemah dadi pasulayan bandayuda. Wadyabala dewa kang aran prajurit dorandara kaseser yudane. Bathara Brama nuli manjing payudan karo mijilake dahana, ngobong wadyabala mungsuh. Wadyabala sing dikanthi Patih Lembusura tumpes tapis tanpa sisa. Patih Lembusura oncat bali ing Guwa Kiskendha. Bathara Brama lan Bathara Indra nuli rembugan. Golong giliging rembug, nglurug mênyang Guwa Kiskendha, supaya kahyangan ora nandang karusakan.
Satekane ing sanjabaning guwa, Bathara Brama sakwadyabalane nuli campuh perang mungsuh wadyabala Guwa Kiskendha. Prajurit dorandara kalah perange. Bathara Brama banjur maju kanthi ngetokake geni salumbung bandung, ngobong Patih Lembusura lan wadyabala buta. Prabu Mahesasura kang nitih Jathasura duka banget. Sigra nempuh Bathara Brama lan Bathara Indra. Dewa 2 iku kalah perange, nuli oncat saka pabaratan. Bathara Indra nedya nggolek srana menyang Sonyapringga, nyaraya Raden Guwarsa (Subali) kang pinuju mbangunake tapa ngalong ing Gunung Sonyapringga, gumantung ing pange wit gedhe. Wusana ya Subali iki kang bisa nyirnakake Prabu Mahesasura lan Jathasura.
Cathetan besut
- Kapethik saking Serat Djaka Lodhang