Prabu Watugunung

Prabu Watugunung iku ratu ing Gilingwesi. Sawijining narendra gung binathara, abala ratu, bala bacingah. Abala ratu tegese balane dumadi saka ratu-ratu telukane. Bala bacingah tegese wadyabala campuran, yaiku wadyabala raseksa karo wadyabala manungsa.

Kang minangka bebeteng negara Gilingwesi, para putrane Prabu Watugunung kang cacahe ana 27. Kang mbarep kekasih Raden Wukir. Ragile kekasih Raden Dhukut.

Prabu Watugunung kagungan kadhaton wesi kang tinretes inten barleyan. Pinatik mawa retna. Kaendahaning kraton, jagad ora ana kang bisa madhani. Endah banget kaya endahe Kahyangan Kaindran.

Katarimaning tapa ing sela garingging 30 taun suwené, njalari Watugunung darbe kasekten tanpa tandhing. Bisa mati yen rila karepe dhewe. Pusaka sipat kandele wujud jemparing, jenenge Kyai Herawana.

Nujum kraton kang uga parampara (juru rembug) ing Gilingwesi asmane Resi Raddhi. Garwane Prabu Watugunung sing kecaket ana 2, yaiku Dewi Sinta Basundari lan Dewi Landhep. Karo Prabu Watugunung, Dewi Sinta Basundari peputra 14 lanang kabeh. Dene Dewi Landhep peputra 13, uga lanang kabeh. Garwa selire asmane Dewi Soma, peputra 1, jenenge Dewi Tumpak.

Minangka pamothahe Dewi Sinta Basundari kang kepengin dimaru tetunggule widadari kahyangan, 7 cacahe, Prabu Watugunung utusan Raden Wukir nglamar widadari 7 ing kahyangan.

Amarga panyuwune Raden Wukir ora diparengake dening Bathara Guru, satemah dadi perang amuk-amukan. Para putra Gilingwesi sing cacahe 27 tumpes tapis. Wekasan Prabu Watugunung nyarira pribadi maju ing palagan. Mungsuh Resi Satmata kang salugune Bathara Wisnu kang ngejawantah. Prabu Watugunung kasoran. Sigra diglandhang ing ngarsane Bathara Guru.

Prabu Watugunung gelem mati, sauger Bathara Guru bisa mbatang cangkrimane, yaiku wit dhakah wohe dhikih, wit dhikih wohe dhakah, wit dhakah wohe dhakah, wit dhikih wohe dhikih.

Winangsulan dening Bathara Wisnu. Kabeh mau wose supaya kabeh turune sarta kulawargané Watugunung tansah pinilala dijupuk daya pigunane. Ya iku sababe engga seprene ana petungan dhêdhasar pawukon. Petungan pawukon yaiku petungan watak lairing ponang jabang bayi, petung kanggo maju perang, sarta petungan wektu. Prabu Watugunung sagarwa putra dadi jeneng wuku (pawukon) sing cacahe ana 30.