Saron panembung
Saron panembung utawa kang sering sinebut ricikan demung ya iku salah siji ricikan utawa waditra Gamelan Jawa[1][2]. Saron panembung saiki lumrah dienggo minangka panjangkep baku gamelan. Ricikan iki kalebu ing golongan waditra wilah. Pigunané saron panembung ya iku ngisi laras-laras balungan gendhing. Jinis saron iki ana rong macem, saron panembung laras sléndro lan laras pélog. Saron iki duwé wilah siji gembyang (oktaf) kang luwih sethithik[1]. Ing sor saron panembung dijangkepi siji ruang gema kanggo ngebanteraké swara kang dikasilaké. Bédané saron iki karo jinis saron liyané iku ukuran wilahé kang cukup amba lan kandel[3]. Ana uga saron panembung nganggo ruang gema kang rupané iku nganggo bumbungan (tabung résonator). Frékuensiné ditala pas ing frékuénsi wilah kang dipasang ing dhuwuré[1].
Rujukan besut
- ↑ a b c Palgunadi, Bram (2002). Serat Kandha Karawitan Jawi. Bandung: ITB Press. kc. 267. ISBN 979-9299-71-3.
- ↑ "Harvard Dictionary of Music". Google Books. Dibukak ing 2017-11-01.
- ↑ "Saron". Ki Demang. Dibukak ing 2017-11-01.