Wikipédia:Artikel pilihan/2018 11

Alexis Tsipras (Yunani: Αλέξης Τσίπρας; lair 28 Juli 1974) iku pulitisi Yunani kang lungguh minangka Mahamantri Yunani kawit 2015. Minangka wong sosialis, Tsipras dadi pangarepé parté pulitik Yunani aran SYRIZA kawit 2009.

Tsipras lair ing Athína ing 1974. Dhèwèké mlebu Kanoman Kuminis Yunani ing wekasané dasawarsa 1980. Ing wiwitané dasawarsa 1990, dhèwèké giyat ing jagat pulitik mligi minangka juru wicara ing protès-protès kang nulak rancangan owah-owahan gedhèn-gedhèn tumrap pangajaran. Dhèwèké nyinau tèhnik sipil ing Universitas Tèhnik Kabangsan Athína, lulus ing 2000, lan nerusaké sarjana ing babagan tata kutha lan wewengkon. Dhèwèké nyambut gawé minangka insinyur sipil ing indhustri yeyasan kang kapernah ing Athína. (Waca candhaké)