Wikipédia

Alexis Tsipras

Pulitisi Yunani

Alexis Tsipras (Yunani: Αλέξης Τσίπρας; lair 28 Juli 1974)[1] iku pulitikus Yunani kang lungguh minangka Nayakotama Yunani kawit 2015 nganti 2019. Minangka wong sosialis, Tsipras dadi pangarepé parté pulitik Yunani aran SYRIZA 2009 nganti 2023

Alexis Tsipras
Αλέξης Τσίπρας
Pangarep Oposisi
Linggih
8 Juli 2019 – 29 Juni 2023
MahamantriKyriakos Mitsotakis
Kang sadurungéKyriakos Mitsotakis
Linggih
20 Juni 2012 – 26 Januwari 2015
MahamantriAntonis Samaras
Kang sadurungéAntonis Samaras
Kang sawiséAntonis Samaras
Nayakotama Yunani
Linggih
21 Sèptèmber 2015 – 8 Juli 2019
PrésidhènProkopis Pavlopoulos
WakilYannis Dragasakis
Kang sadurungéVassiliki Thanou
Kang sawiséKyriakos Mitsotakis
Linggih
26 Januwari 2015 – 27 Agustus 2015
PrésidhènKarolos Papoulias
Prokopis Pavlopoulos
WakilYannis Dragasakis
Kang sadurungéAntonis Samaras
Kang sawiséVassiliki Thanou
Mantri Jaban Rangkah
Linggih
20 Oktober 2018 – 15 Fèbruwari 2019
Kang sadurungéNikos Kotzias
Kang sawiséGeorgios Katrougalos
Lurah ing Syriza
Linggih
7 Sèptèmber 2009 – 29 Juni 2023
Kang sadurungéAlekos Alavanos
Kang sawiséStefanos Kasselakis
Rerincèn dhiri
Lair (1974-07-28) 28 Juli 1974 (umur 50)
Athína, Yunani
Parté pulitikParté Kuminis (sadurung 1991)
Synaspismos (1991–2013)
Syriza (2013–)
Gayutan pulitik liyaParté Kiwa Éropah
JatukramaPeristera Baziana
Anak2
PilungguhMaximos Mansion
WiyataUniversitas Tèhnologi Nasiyonal Athína
Tandha tangan

Tsipras lair ing Athína ing 1974. Dhèwèké lumebu Kanoman Kuminis Yunani ing wekasané dasawarsa 1980. Ing wiwitané dasawarsa 1990, dhèwèké giyat ing jagat pulitik mligi minangka juru wicara ing protès-protès kang nulak rancangan owah-owahan gedhèn-gedhèn tumrap pangajaran. Dhèwèké nyinau tèhnik sipil ing Universitas Tèhnik Kabangsan Athína, lulus ing 2000, lan nerusaké sarjana ing babagan tata kutha lan wewengkon. Dhèwèké nyambut gawé minangka insinyur sipil ing indhustri yeyasan kang kapernah ing Athína.

Saka 1999 nganti 2003, Tsipras dadi panitra Kanoman Synaspismos. Dhèwèké tinanggenah lid Panitya Pokok Synaspismos ing 2004, banjur lumebu ing Kapanitran Pulitisé Synaspismos. Ing pilihan umum enggonan 2006, dhèwèké minangka caloné SYRIZA kanggo kalungguhan Walikutha Athína lan menang 10,5%. Ing 2008, dhèwèké kapilih dadi pangarepé SYRIZA, nggantèni Alekos Alavanos. Dhèwèké tembé kapilih lumebu Parlemèn Yunani, makili Athína A, ing 2009 lan kapilih manèh ing Mèi lan Juni 2012, banjur dadi Pangarepé Oposisi lan yasa kabinèt wayangan.

Ing Januwari 2015, SYRIZA kanthi dipandhégani Tsipras menangaké pilihan umum lègislatif, olèh 149 saka 300 kursi ing Parlemèn Yunani lan nggawé kowalisi karo Parté Rakyat Yunani Mardika (Yunani: Ανεξάρτητοι Έλληνες). Pitung sasi ndungkap mangsané linggih minangka Nayakotama, dhèwèké kélangan pérangan gedhéné sengkuyungané amarga ana pambaléla ing intraparté. Rikala 20 Agustus 2015, Tsipras sèrèh lan ngatur pilihan umum rikat kang kalakon ing sasi candhaké. Ing pilihan umum Sèptèmber 2015, SYRIZA bali menang lan olèh 145 saka 300 kursi lan mbalèni nata kowalisiné karo Parté Rakyat Yunani Mardika. Minangka Nayakotama, dhèwèké ngawasi rundhingan bab krisis utangé Pepréntahan Yunani. Dhèwèké uga miwiti réferèndhum kanggo nylametaké ékonominé Yunani nganggo dana talangan saka mancanagara (bailout) lan ngadhepi krisis wong ngungsi ing Éropah. In 2015, dhèwèké dipilih kalawarta TIME minangka salah siji saka 100 wong kang banget mrabawani ing jagat.[2]

Tsipras minangka Nayakotama Yunani sok kadakwa luput amarga kapeksa nampa rékadaya-rékadaya pangéman supaya nagarané slamet, nanging tandangé ora jumbuh karo jangjiné sadurungé pilihan umum. Dhèwèké uga kadakwa kang njalari masalah ékonomi Yunani sangsaya ndadra. Yunani wis kélangan 25% saka GDP-né kawit wiwité krisis.[3]

Kala nom lan karir

besut

Tsipras lair ing 28 Juli 1974 ing Athína. Kulawargané asli siji désa ing cedhak Babaeski ing tlatah Thraki Wétan ing Turki. Nalika kalakon konpènsi ijol warga antarané Turki lan Yunani, kulawargané kapeksa boyongan saka Turki menyang Yunani.[4] Bapaké aran Pavlos lair ing Epirus lan minangka kontraktor pagawéan gedhé tumrap praja.[5][6][7] Ibuné lair ing Eleftheroupoli.[8]

Tsipras lumebu Kanoman Kuminis Yunani ing wekasané dasawarsa 1980. Ing kawitané dasawarsa 1990, minangka murid Pamulangan Luhur Multidhisiplin Ampelokipoi, dhèwèké giyat ing kagiyatan pulitik kaya ta mbaléla lan ngejègi pamulangan[9] minangka panulaké tumrap ukum kang kontropèrsil wetoné Mantri Wiyata Vassilis Kontogiannopoulos. Tsipras dadi luwih kondhang minangka wakilé obah-obahan siswa kawit diundhang juru warta Anna Panagiotarea minangka dhayoh ing gelaran wicara télévisi. Sasuwéné wawan wicara, Panagiotarea kandha ora blaka yèn Tsipras ora burus anggoné mbélani hak siswa pamulangan madya lan luhur kanggo absèn tanpa perlu idin wong tuwa.[10] Ariwarta lan pulitikus oposisi sok nitik Tsipras ora sembada amarga nalika enom dhèwèké minangka aktipis murih bisaa pamulangan praja lelahanan (gratis), nanging nalika wis dadi Nayakotama dhèwèké luwih milih nyekolahaké anaké ing pamulangan swasta.[11][12]

Tsipras sinau tèhnik sipil ing Universitas Tèhnik Kabangsan Athína (UTKA), lulusan 2000, sadurungé miwiti sinau pascasarjana bab tata kutha lan wewengkon sawisé njupuk MPhil antardhépartemèn ing Pamulangan Arsitèktur UTKA. Sinambi sinau ing pascasarjana, dhèwèké wiwit nyambut gawé minangka insinyur sipil ing bab indhustri yeyasan. Dhèwèké nulis sawenèh studhi lan proyèk mawa irah-irahan kutha Athína.[10][13][14]

Nalika mahasiswa, Tsipras mèlu jajaran obah-obahan kiping kiwa (left wing) mligi ing grup aran "Enceladus" (Yunani: Εγκέλαδος) kang giyat manèh. Minangka lid grup mau, dhèwèké banjur kapilih tumrap paheman èksekutif ing sarékat mahasiswa Pamulangan Tèhnik Sipil UTKA lan tumindak minangka wakil mahasiswa ing Sénat Universitas. Saka 1995 tekan 1997, dhèwèké minangka lid pethingan ing Rad Séntral saka Sarékat Mahasiswa Kabangsan Yunani (EFEE).[10]

Karir pulitik 1999-2015

besut
 
Tsipras ing Bologna mènèhi sesorah kanggo aliyansi The Other Europe.

Sawisé Parté Kuminis Yunani metu saka kowalisi Synaspismos ing 1991, Tsipras panggah ing kowalisi iku. Ing Mèi 1999, dhèwèké dadi panitra kapisan ing golongan kanoman Synaspismos aran Kanoman Synaspismos. Ing mangsa iku, dhèwèké minangka sèntris. Mangkonoa, ing tembé nalika dadi lurahé Synaspismos, dhèwèké kasuwur ndhoyong marang kiping kiwa radhikal. Dhèwèké menang akèh pangaji nalika iku. Ing Nopèmber 2003, kalungguhané digantèni Tasos Koronakis lan dhèwèké ngalih menyang parté babon.

Minangka panitra Kanoman Synaspismos, dhèwèké katut ing rékadaya yasa Forum Sosiyal Yunani lan akèh laku protès nulak globalisasi néyoliberal. Ing Dhésèmber 2004 ing Konggrès Synaspismos 4, dhèwèké kapilih dadi lid Kumite Pulitik Séntral saha lid Kapanitran Pulitik parté iku. Ing Kapanitran Pulitik iku, dhèwèké minangka kang tanggung jawab ing babagan panggulawenthahan (pangajaran) lan kanoman.[10]

Tsipras tembé lumebu ing pulitik Yunani ilèn baku (mainstream) ing mangsa pilihan umum enggonan 2006. Nalika iku, dhèwèké nyalonaké dadi Walikutha Athína sarana kampanyé "Anoihti Poli" (Yunani: Ανοιχτή Πόλη, "Kutha Binuka") saka parté SYRIZA. Dhèwèké olèh swara 10,51% saka warga Athína lan mandheg ing tataran katelu. Tsipras olèh kalungguhan ing rad Kuthamadya Athína amarga jenengé kapacak ing urutan siji ing pratélané parté SYRIZA.[10][15] Dhèwèké ora nyalonaké dadi lid Parlemèn Yunani nalika pilihan umum 2007, nanging milih ngrampungaké mangsa kalungguhané minangka lid rad Kuthamadya Athína.

Tsipras kapilih dadi lurahé Synaspismos ing konggrès kalima ing 10 Pèbruwari 2008 amarga lurah sadurungé, Alekos Alavanos, mutusaké sèlèh jalaran alesan pribadi.[16] Tsipras dadi lurah Synaspismos nalika umur 33, mula karan lurah enom dhéwé ing parté pulitik Yunani kawit 1931. Ing pilihan umum 2009, dhèwèké kapilih lumebu ing Parlemèn Yunani tumrap tlatah Athína A lan ing tembé kapilih mutlak dadi lurahé golongan parlemènter SYRIZA.[17][18] Tsipras mandhégani SYRIZA lumantar pilihan umum 2012, nyeksèni alihan swara 22% menyang parténé, lan dadi Pangarep Oposisi lan lurah Kabinèt Wayangan Alexis Tsipras.

 
Alexis Tsipras mènèhi sesorah minangka calon présidhèn ing Konggrès Synaspismos 5.

Ing Dhésèmber 2013, Tsipras minangka calon kapisan kang diusulaké GUE/NGL (Kiwa Manunggal Éropah/Kiwa Ijo Nor) tumrap kalungguhan présidhèn ing Komisi Uni Éropah. Olèhé dicalonaké iku kanggo pilihan umum tumrap Parlemèn Éropah ing Mèi 2014 kang bakal ditindakaké nagara-nagara gegelitané Uni Éropah.

Tsipras kampanye minangka siji-sijiné calon saka nagara-nagara tapel wates kidul. Ing kawitan Mèi 2014, ing siji sesorah ing Berlin, dhèwèké njlèntrèhaké manéka rupa kalungguhané kanggo lumawan ilèn pulitik néyoliberal ing Éropah kang diwengku (didhominasi) Merkel. Tsipras tetawa rancangan owah-owahan gedhé kang luwih becik tumrap wong Éropah kang bakal katon 10 taun bésuk. Dhèwèké nyebut péhak-péhak kang ora kuwawa nangani krisis ardana (financial) saka 2008 tekan 2014 kang njalari wong tuna karya akèhé ora kinira mligi ing Uni Éropah. Sesorahé nganggo basa Inggris ing arepé wong-wong Jerman lan kanggo kasiyaraké ing saindengé Éropah.[19] Sanajan menang ing Yunani, kanthi menang enem saka 21 kursi Yunani ing Parlemèn Éropah, GUE/NGL mandheg ing urutan kalima ing saindengé Éropah.

Nayakotama

besut

Mangsa kapisan (Januwari–Agustus 2015)

besut
 
Alexis Tsipras ndokok mawar abang ing Sasana Panambegan Kaisariani.

SYRIZA nalika dipimpin Tsipras menang pilihan umum kang kagelar ing 25 Januwari 2015, sanajan kurang rong kursi supaya dadi mayoritas ing parlemèn. Ésuké, Tsipras ngadani mupakatan karo parté Yunani Mardika, kang kondhang minangka populis kiping tengen (right wing), saperlu yasa kowalisi.

Ing dina kang padha, minangka Nayakotama kang enom dhéwé ing sajarah Yunani kawit 1865, dhèwèké dikepyakaké Présidhèn Karolos Papoulias nganggo ukara "Ingsun mratélakaké lumantar jeneng, kaurmatan, lan budi ingsun bilih sedya njunjung undhang-undhang lan ukum-ukumé."[20] Tsipras uga minangka nayakotama kapisan kang nganggo sumpah kalungguhan sipil, dudu sumpah kalungguhan agama. Kang mangkono nandhani sudané prabawané budaya upacara ortodhok Yunani.[21] Sanajan kandha yèn parténé isih sesambungan becik karo gréja, dhèwèké njalari gendra nalika patemon karo Mahabiskop Ieronymos. Tsipras mratélakaké yèn dhèwèké ora bakal nganggo sumpah kalungguhan agama amarga dhèwèké atéis kang ora pikrama sarana upacara agama lan ora mbaptis anak-anaké.[22]

Kang kapisan ditindakaké Tsipras sawisé kepyakan iku nekani Sasana Panambegan (memorial) Kaisariani. Dhèwèké ndokok mawar abang kanggo mèngeti wong 200 kang mbélani Yunani kang diperjaya Wehrmacht Jerman ing 1 Mèi 1944.[23]

Ing patemon kapisan saka kabinèt anyar, Tsipras ngumumaké prakara-prakara kang kudu tinengenaké pepréntahan saperlu ngrampungi "krisis kamanungsan" ing Yunani, rundhingan-rundhingan karo Uni Éropah lan IMF kanggo ngambali nata utangé Yunani, lan pangecaké jangji-jangjiné SYRIZA kaya déné mbusek niti-niti swastanisasi saka pepréntahan sadurungé.[24]

Ing 3 Pèbruwari, Tsipras nindakaké lawad prajan (state visit) resmi kang kapisan marang Nayakotama Itali Matteo Renzi ing Roma. Wong loro iku nggelar pasamuwan près (press conference) barengan kanggo nyatakaké rasa prihatiné tumrap rékadaya pangéman kang dicakaké Kumisi Juncker lan wènèh panemu manawa undhak-undhakan ékonomi minangka sawiji cara kanggo metu saka krisis. Sarampungé pasamuwan près, Renzi mènèhi Tsipras bebungah dhasi Itali. Tsipras, kang kaciri amarga ora tau nganggo dhasi, ngaturaké panuwun marang Renzi lan kandha bakal nganggo dhasiné ing acara slametan nalika Yunani kasil ngambali rundhingan bab rékadaya pangéman mau.[25]

 
Tsipras lan Présidhèn Kumisi Éropah Jean-Claude Juncker, 13 Maret 2015

Ing 20 Pèbruwari, Eurogroup mupakatan karo Yunani saperlu ndawakaké mangsa dana talangan Yunani nganti patang sasi.[26] Tsipras uga martakaké lungané menyang Mosko ing 8 April saperlu ngéntukaké panyengkuyungé Ruslan.[27]

Ing 31 Mèi, Tsipras njlèntrèhaké panyruwéné lan rancangané minangka dudutan saka kadadéan-kadadéan kawit pamilihan umum. Pepuntoning panemuné ya iku ana saorané rong gegayuhan kang adu arep kanggo integrasi Éropah. Leloroné ora silih laras lan ana péhak mirunggan kang duwé "obsèsi" anggoné ngecakaké program tèhnokratiké dhéwé.[28]

Ing 22 Juni, Tsipras medharaké proposal Yunani kang anyar, kang isiné kalebu ngundhakaké umur pènsiyunan baka sathithik dadi 67 lan matesi pènsiyun gasik. Proposal mau uga nawa owah-owahan gedhé ing tata pajeg winuwuhan aji (value-added-tax) supaya tarip pokoké dadi 23 persèn.[29] Ing 29 Juni, bang-bang Yunani panggah tutup lan Tsipras kandha manawa tindakan mangkono kanggo ngendhalèni pawitan. Dedagangan panduman (stocks) lan obligasi (bonds) Yunani uga kaendheg.[30][31]

Réferèndhum bab dana talangan (bailout)

besut

Ing 27 Juni 2015, Tsipras ngumumaké réferèndhum kanggo mutusaké kudu-orané Yunani nampa wewaton dana talangan kang diusulaké Kumisi Juncker barengan karo IMF saha Bang Séntral Éropah.

Tsipras mrayogakaké wong-wong supaya mènèhi swara "Ora". Ing 3 Juli, dhèwèké sesorah ing sangarepé udakara wong 250.000 ing alun-alun Syntagma ing arepé parlemèn. Ing kono, dhèwèké nulak pepéliké sawatara pangarep, ya iku yèn kasilé pilihan umum ing dina Minggu iku "Ora", Yunani bisa katundhung saka laladan yuro (Eurozone). Dhèwèké ngumumaké "Ing dina Minggu, awak dhéwé ora mung mutusaké supaya tetep ing Éropah, nanging awak dhéwé mutusaké supaya panggah urip luhur ing Éropah".[32] Kasilé réferèndhum ya iku 61,3 persèn milih "Ora."[33]

Fidel Castro ngirimi Tsipras layang slamet kawit wijayané swara "Ora". Ing layang iku, dhèwèké kandha yèn sudirané wong Yunani dadi gumuné wong-wong Amérikah Latin lan Karibiyah.[34]

Mupakatan bab dana talangan

besut

Sarampungé rundhingan sawatara dina, ing 13 Juli 2015 Tsipras wusana mupakatan karo péhak kang nyilihi dhuwit.[35] Yunani bakal olèh silihan dhuwit kèhé 82 nganti 86 milyar yuro kang bakal kawènèhaké baka sathithik kawit 2015 nganti Juni 2018. Sawaliké, Yunani kudu (1) ngundhakaké pajeg-kawuwuhan-aji utawa VAT, (2) ngowahi tata pènsiyun, (3) mesthèkaké ELSTAT bisa lumaku mardika, (4) ngethok blanja nagara supaya olèh punjulan (surplus), (5) nganyari pangadilan supaya putusan bisa ginawé rikat, (6) nganut owah-owahan kang diusulaké OECD, (7) njabut pranatan-pranatan kang diabsahaké Tsipras kajaba pranatan kang gegayutan "krisis kamanungsan", (8) ngambali mawiti bang-bang, (9) nindakaké swastanisasi marang barang-barang darbéné nagara kang ajiné 50 milyar, lan (10) nyuda blanja ing babagan publik. Kanthi mangkono, Tsipras bakal olèh pakèt Juncker kang ajiné 35 milyar yuro kang ancasé kanggo nulungi tuwuhé ékonomi Yunani.[36] Pepréntahan Yunani kang diwengku parté SYRIZA iku nampa pakèt dana talangan kang isiné ngethok dana pènsiyun luwih akèh lan ngundhakaké pajeg. Prakara iku kang ditulak wong Yunani nalika réferèndhum.[37]

Ing 14 Agustus, parlemèn Yunani nyengkuyung mupakatan dana talangan kang anyar, sanajan punjul 40 lid parlemèn saka parté SYRIZA milih nulak mupakatané lan Tsipras kudu gumantung marang panyengkuyungé oposisi kang pro-Uni Éropah kaya ta parté Dhémokrasi Anyar, To Potami, lan PASOK. Tsipras ngandhani lid parlemèn manawa nagara lagi ngadhepi rong pilihan antarané "panggah urip utawa nglampus dhiri." Dhèwèké uga kandha, "Aku duwé rasa-pangrasa kang pramana manawa prayogané kita nampa iku (dana talangan) ing kaanan Éropah saiki kang kuwasané satimbang lan ing kaanan ékonomi lan lara ardana kang kaener marang kita."[38]

Sèrèh

besut

Ing 20 Agustus 2015, Tsipras sèrèh saka Nayakotama Yunani amarga pambalélané lid-lid parlemèn saka parténé dhéwé, SYRIZA, lan ngumumaké pilihan umum rikat.[39] Dhèwèké ngumumaké resmi kanthi siniyaraké ing télévisi. Sawurungé parté-parté oposisi yasa pepréntahan, Vassiliki Thanou-Christophilou tinanggenah Nayakotama-antara nganti pilihan umum bisa katindakaké.

 
Tsipras lan Panitra Praja Amérikah Sarékat John Kerry, 30 Sèptèmber 2015

Mangsa kapindho (2015–2019)

besut

Pilihan umum ambalan

besut

Sanajan ing pilihan umum sadurungé olèh sathithik, mung 57% lumawan 64%, Tsipras olèh swara kuwat ing pilihan umum 20 Sèptèmber. Parté SYRIZA olèh 35,50% swara,[40] kang cukup kanggo y

yasa kowalisi karo ANEL.[41] Aliya saka iku, ing pepréntahan kang, Tsiprassipras nanggenah Dimitris Kammenos, pulitikus ANEL, minangka wakil mantri pambangunan, pangangkudan, lan jejaringan. Pamilihé iku njpadudonianemu amarga Kammenos kaciri anti wong Yahudi, rasis, lan samatrasa (homophobic)ocèhan-ocèhanéndhané ing Twitter, kaya ta ndakwa yèn wong Yiauikang kang nindakaké gègèr 9/11.[42] Panulak tumrap dhèwèké wusana meksa Kammenos mundhur. Mula, dhèwèké olèhé dadi mantri ora nganti 12 jam.[43]

Pepréntahan kapindho

besut

Ing 27 Sèptèmber, Tsipras kandha marang Bill Clinton ing Clinton Global Initiative bab butuhé ngambali nata utangé Yunani, ngowahi administrasi publik lan nekakaké inpèstasi.[44] Ing 30 Sèptèmber, Panos Kammenos (Mantri Pangayoman) mèngeti wijayané Yunani ing perang Salamina. Tindakané njalari padudon amarga sawenèh wong ngarani olèhé mèngeti mirib tindakané junta.[45][46] Ing 9 Oktober, Tsipras karo Panos Kammenos marani gladhi militèr aran Parmenion mawa busana jakèt militèr.[47]

Ing 22 Oktober, punggawa pangumpul pajeg kang kondhang ing Yunani aran Katerina Savvaidou dilèrèhi Tsipras amarga dinuga nerusaké idin setasiyun télévisi kang mbayar pajeg pariwara 20 persèn.[48] Rékadaya kang ditindakaké pepréntahané njalari gendra. Wong-wong tani ngancam nggawa traktor-traktoré menyang Athína lan para apotèker mogok makarya.[49] Ing 7 Nopèmber, Tsipras olèh panampa sengit nalika nekani kémah-kémah wong ngungsi ing Lesbos lan diadhang protès wong satusan kang nganggo jakèt kambang (life jacket) mawa blabag kang isiné kongkon supaya Uni Éropah ngendheg pepati kanthi cara ngidinaké lan nglégalaké wong ngungsi teka menyang Éropah.[50] Ing dina kang padha, Giannis Panousis, tilas Mantri Sulih ing Pangayoman Warga (Alternate Minister of Citizen Protection) ing kabinèt kapisan, kandha manawa ana gegayutan antarané pulitikus lan téroris lan manawa pulitikus ing pepréntahan saiki péngin matèni awaké dhéwé. Dhèwèké ndakwa Tsipras weruh prakara iku. Nanging, pandakwané ora kacihna.[51]

 
Tsipras lan Présidhèn Ruslan Vladimir Putin, 15 Mèi 2017

Ing 17 Nopèmber, sabubaré diala-ala wong anarki, ing sesorahé ing parlemèn, Tsipras mbandhingaké wong-wong anarki mau karo parté Chrysí Avgí lan kandha manawa ora butuh anané juru slamet kang ora ingundhang "kang rumangsa bisa njangka urip lan pati".[52] Ing 18 Nopèmber, Tsipras minangka nayakotama Yunani kapisan kang nekani Provinsi Izmir ing Wewengkon Ege ing Turki kawit wadyabala Yunani ngejègi Smyrna. Dhèwèké teka ing Turki saperlu patemon karo Nayakotama Ahmet Davutoğlu. Leloroné sarujuk saperlu tembayatan lan bakal ana tembayatan ing babagan tèhnik antarané jaga pasisir (coast guard) Yunani lan Turki.[53]

Ing 8 Mèi 2016, Tsipras ngukuhaké rékadaya pangéman anyar ing parlemèn kang isiné nglimputi undhak-undhakan pajeg marang wong kang pakolèhé sedhengan lan dhuwur lan ngethok ardana kang nyrambahi samubarang péhak kang bakal ngéman GDP Yunani telung persèn. Owah-owahan uga nglimputi mbusek korting ing pajeg-kawuwuhan-aji, ngethok pènsiyun, lan murungaké sawenèh pranatan. Tsipras ngajak wong-wong supaya padha sarèh, nanging uga sarujuk marang pakèt pangéman lan kandha manawa pangéman iku minangkani mupakatané karo Uni Éropah taun kapungkur.[54] Ing 22 Mèi, Tsipras ngukuhaké rékadaya pangéman lanjutan. Undhang-undhang nglebokaké rékadaya "ora dinuga" kaya ta ngethok opah lan pèsiyun, kang bakal lumaku langsung manawa tindakan-tindakané ing tembé ora mathuk karo rantaman (budget). Pajeg sigarèt, kopi, lan bir kaundhakaké, déné pajeg properti kaatur manèh supaya ngundhakaké pakolèh saka yasan-yasan gedhé. Siji agènsi swastanisasi anyar kayasa lan olèh wewenang 99 taun kanggo ngembangaké lan ngadol properti darbéné praja. Tsipras ngukuhaké anggoné nindakaké rékadaya fiskal. "Mangsa sumber (spring) bokmanawa wis mèh rampung, nanging awak dhéwé ngantu-antu sumber ékonomi lan bali nuwuhaké (ékonomi) taun iki," kandhané nayakotama marang parlemèn.[55]

 
Tsipras lan Présidhèn Amérikah Sarékat Donald Trump, 18 Oktober 2017

Ilias Kasidiaris saka parté Chrysí Avgí teka ing protès anti-masjid ing Athína nalika 4 Nopèmber 2016. Wosé protèsé iku bab masjid kang didanani pepréntahan kang diwengku SYRIZA amarga manggoni palemahan Wadya Lautan Yunani lan nganggo dhuwit nagara anggoné yasa. Kaanan iku njalari panampa ala déning publik ing njero nagara lan saka manéka golongan pulitik, uga kawartakaké tekan njaban rangkah. Panampa ala iku amarga pepréntahan ngethok blanja publik kanggo warga Yunani kang pérangan gedhéné (punjul 98% [56]) wong Kristen Ortodhok Yunani.[57] Nanging, pepréntahan lan oposisi nyengkuyung yasané masjid kapisan ing Athína sanajan ana panampa ala saka warga lan parté amarga temahané ing babagan ardana lan undhang-undhang. Prakara liyané ya iku pepréntahan kang diwengku SYRIZA ngupaya nyuda prabawané Gréja Ortodhok Yunani ing bebrayan agung Yunani.

Ing wawancara karo The Guardian kang kababar ing 24 Juli 2017, Tsipras mènèhi panemu manawa ékonomi Yunani "mundhak" lan "kang ala-ala wis kapungkur." Dhèwèké uga pracaya manawa Yunani ora bakal gumantung manèh marang dana talangan lan pangawas internasiyonal ing 2018. Miturut lapuran médhiyah saka tengah Juli, Yunani ngrancang arep mèlu manèh pasar obligasi, kawit metu nalika 2014, saperlu nyilih saka pasar pawitan.[58] Tindak mangkono kinira amarga pepréntahan bisa mbabar obligasi limang taun sanalika nalika weton ing obligasi Yunani lagi cendhak-cendhaké kawit nagara iku ninggal pasar ing taun 2014.[59] Wara-warané metu sawatara dina sawisé IMF "manut asasé" nampa Yunani anggeré anggoné nyilih ardana kèhé $1,8 milyar. IMF mutusaké anggoné mènèhi ardana silihan gumantung marang bisané utangé Yunani pulih tanpa gumantung péhak njaba manèh, uga ndhesek nagara-nagara ing laladan yuro mènèhi pitulung marang Yunani nangani utangé.

In Oktober 2017, Nayakotama Tsipras patemon karo Présidhèn Donald Trump ing Washington DC. Présidhèn Donald Trump ngandhani Nayakotama Yunani Alexis Tsipras manawa dhèwèké nyengkuyung rancangan "pitulung utang kang tanggung jawab" marang Yunani. Ngadeg ing sandhingé Tsipras ing Taman Mawar ing Griya Séta (White House), Trump kandha manawa wong Amérikah “nyengkuyung wong Yunani pulih saka krisis ékonomi”.[60] Trump kandha yèn Yunani wis "ngliwati akèh prakara" ing kala masalah ékonomi kang dawa lan jangji manawa Amérikah Sarékat bakal tetep santosa nalika nindakaké rancangan pitulung utang. Trump uga kandha manawa pepréntahané wis ngabari Konggrès bab anané kamungkinan dol-tinumu kanggo nganyari montor mabur F-16 ing Wadya Gegana Yunani. Blanjan iku ajiné $2,4 milyar. Tsipras kandha yèn dhèwèké lan Trump ana dol-tinuku kang prodhuktif lan "ora rumangsa kaancam sawayah-sayah" nalika sapatemon. Pangarep Yunani iku uga kandha yèn nuggal "ajèn" (value) karo Amérikah Sarékat.[61]

Urip pribadi

besut

Tsipras ora pikrama. Pasangané kang kadhaptar resmi aran Peristera "Betty" Baziana, insinyur èlèktronik lan komputer. Leloroné pranggulan ing 1987, nalika umur 13, ing Pamulangan Luhur Cawang Ampelokipoi. Leloroné ing tembé dadi lid Kanoman Kuminis Yunani. Wong loro iku urip barengan ing Athína karo anak lanangé loro.[62] Anak lanangé kang ragil jenengé tengah Ernesto kanggo ngajèni Che Guevara. Tsipras iku pandhemen bal-balan lan gedhé ing stadhiyon, nyengkuyung Panathinaikos, sabisané nekani saben tetandhingan ing jeron nagara.[7] Tsipras ngaku minangka atéis.[63][64] Kang mangkono njalari dhèwèké dadi salah siji saka rong pangarep pepréntahan lan praja ing Uni Éropah kang atéis nalika kasumpah. Aliya saka dhèwèké ya iku Présidhèn Céko Miloš Zeman.[65]

Réferènsi

besut
  1. ↑ "What You Need To Know About Alexis Tsipras, The Greek Leader Who Wants To Change Europe". Huffington Post. 26 Januari 2015.
  2. ↑ "Time 100 - Alexis Tsipras, by Pablo Iglesias - time.com". Alexis Tsipras | TIME. 16 April 2015.
  3. ↑ "Τime: O Tσίπρας στη λίστα με τους πέντε λιγότερο δημοφιλείς αρχηγούς, μετά τον Τραμπ". 23 Mèi 2017. Dibukak ing 17 Mèi 2018.
  4. ↑ "Dünyanın konuştuğu Yunan lider Çipras, Babaeskili çıktı". Hürriyet. Dibukak ing 31 Januari 2015.
  5. ↑ "Alexis Tsipras: Who is Greece's New Prime Minister? (Full Profile & Bio) - GreekReporter.com". greece.greekreporter.com. Dibukak ing 17 Mèi 2018.
  6. ↑ Αλέξιος Παύλου Τσίπρας : ΠΡΟΕΔΡΟΣ ΤΗΣ Κ.Ο. ΤΟΥ ΣΥΝΑΣΠΙΣΜΟΥ ΡΙΖΟΣΠΑΣΤΙΚΗΣ ΑΡΙΣΤΕΡΑΣ ΒΟΥΛΕΥΤΗΣ Α' ΑΘΗΝΩΝ . Hellenic Parliament. Dibukak ing 16 Oktober 2010.
  7. ↑ a b Andy Denwood (14 Mèi 2012). "Profile: Alexis Tsipras, leader of Syriza". BBC News.
  8. ↑ Apostolidis, Tasos (28 Novèmber 2007). Αλέξης Τσίπρας: "Καβαλιώτης" και μόλις 33 Μαΐων το φαβορί για την ηγεσία του ΣΥΝ. KavalaNet . kavalanet.gr. Dibukak ing 22 Mèi 2009.
  9. ↑ "How Greece's prime minister rose from high school activist to high politics". Dibukak ing 17 Mèi 2018.
  10. ↑ a b c d e "Alexis Tsipras". Synaspismos. syn.gr. Diarsip saka sing asli ing 12 Juni 2011. Dibukak ing 22 Mèi 2009.
  11. ↑ "Tsipras exploits his state school education but chooses elitism for sons (pics)", Proto Thema, Sep, 14 2015
  12. ↑ "Άφωνος ο Τσίπρας στην ομιλία Μητσοτάκη στη Βουλή για την Παιδεία" (Speechless Tsipras during Mitsotakis' talk in the Parliament on education), Elefteros Typos, 28/09/16. In Greek language.
  13. ↑ Σχόλιο Γραφείου Τύπου του ΣΥΝ για τις προσωπικές επιθέσεις εναντίον του Προέδρου του ΣΥΝ – Επισύναψη επιστολών . syn.gr. 21 Novèmber 2008. Dibukak ing 16 Oktober 2010.
  14. ↑ Αλέξης Τσίπρας . enet.gr. 9 Oktober 2009. Dibukak ing 16 Oktober 2010.
  15. ↑ "Coalition selects A. Tsipras for Athens mayorship". ANA-MPA. Dibukak ing 22 Mèi 2009.
  16. ↑ "Tsipras new SYN leader, new CPC elected". ANA-MPA. ana.gr. Dibukak ing 26 April 2009.
  17. ↑ Ανανέωση αλλά και ηχηρές απουσίες στη νέα Βουλή. ANA-MPA . 9 Oktober 2006. Dibukak ing 9 Oktober 2009.
  18. ↑ "Alexis Tsipras to head SYRIZA Parliamentary group". Athina 9.84 Municipal Radio. athina984.gr. 8 Oktober 2009. Diarsip saka sing asli ing 17 Juli 2011. Dibukak ing 9 Oktober 2009.
  19. ↑ "Archived copy". Diarsip saka sing asli ing 17 Mèi 2014. Dibukak ing 2014-05-17.{{cite web}}: CS1 maint: archived copy as title (link)
  20. ↑ "Greek Elections: Alexis Tsipras sworn in as the new Greek Prime Minister". newsit.gr. 26 Januari 2015. Dibukak ing 10 Fèbruari 2015.
  21. ↑ "A courteous distance". The Economist. 26 Januari 2015. Dibukak ing 10 Fèbruari 2015.
  22. ↑ "Tsipras explanation to Archbishop over lack of religious oath of office". Proto Thema. 26 Januari 2015. Dibukak ing 10 Fèbruari 2015.
  23. ↑ Helena Smith (26 Januari 2015). "Alexis Tsipras pays homage to Greek communists at site of Nazi atrocity". The Guardian. Dibukak ing 14 Fèbruari 2015.
  24. ↑ ""Ανατροπές παντού -Αλλάζουν όλα σε ΔΕΗ, Παιδεία, Δημόσιο, ιδιωτικοποιήσεις" (Total recall - Everything changes in Public Power Corp., Education, Public Sector and privatizations)". iefimerida.gr. Dibukak ing 28 Januari 2015.
  25. ↑ "Tsipras, il tour anti-austerità a Roma. Padoan: "Crescita priorità per la Grecia"". Repubblica.it. 3 Fèbruari 2015.
  26. ↑ "Eurozone chiefs strike deal to extend Greek bailout for four months". theguardian.com. Dibukak ing 20 Fèbruari 2015.
  27. ↑ Khan, Mehreen (6 April 2015). "Isolated Greece pivots east to Russia, China and Iran. But will it work?". The Daily Telegraph. London. Dibukak ing 6 April 2015.
  28. ↑ lemonde.fr: "Alexis Tetep :" Non à une zona euro à deux vitesses "", 31 Mei 2015
  29. ↑ "Yunani nawakake rencana anyar kanggo menging default, tukang kredit ndeleng sawetara pangarep-arep", Reuters, 22 juni 2015
  30. ↑ Mark Thompson (28 Juni 2015). "Greece shuts banks in bid to prevent collapse". CNNMoney.
  31. ↑ "Greek debt crisis: Banks to stay shut, capital controls imposed". BBC News.
  32. ↑ "Greece PM urges 'No' vote to 'live with dignity in Europe'". Yahoo News UK. 3 Juli 2015.
  33. ↑ Δημοψήφισμα Ιούλιος 2015, Ministry of Interior lan Administratif Reconstruction. (diakses 5 juli 2015)
  34. ↑ ""Συγχαρητήρια επιστολή Φιντέλ Κάστρο στον Αλέξη Τσίπρα" (Congratulation letter by Fidel Castro to Alexis Tsipras)". kathimerini.gr. Dibukak ing 6 Juli 2015.
  35. ↑ "Αναλυτικά τι προβλέπει η συμφωνία της Συνόδου Κορυφής". news247.gr. Dibukak ing 13 Juli 2015.
  36. ↑ "A new start for jobs and growth in Greece: Commission mobilises more than €35 billion from the EU budget". europa.eu. Dibukak ing 15 Juli 2015.
  37. ↑ Jerman-Mimpin Eurozone Ngetokake Kudeta Marang Pamaréntah Yunani. Ing Huffington Post. 12 juli 2015.
  38. ↑ "Greek MPs back €85bn bailout after marathon talks". bbc.com. Dibukak ing 14 Agustus 2015.
  39. ↑ "Greece crisis: PM Alexis Tsipras quits and calls early polls". BBC News. Dibukak ing 20 Agustus 2015.
  40. ↑ "Guardian". Dibukak ing 10 Novèmber 2015.
  41. ↑ "Voter Turnout in Greek Elections Drops to New Historic Low". Greek Reporter. 21 Sèptèmber 2015. Dibukak ing 21 Sèptèmber 2015.
  42. ↑ "Greek Prime Minister Alexis Tsipras just appointed a minister with a horrendous record of anti-Semitic comments". businessinsider.com. Diarsip saka sing asli ing 2015-09-26. Dibukak ing 23 Sèptèmber 2015.
  43. ↑ ""Dimitris Kammenos resigns" Παραιτήθηκε ο Δημήτρης Καμμένος". iefimerida.gr. Dibukak ing 23 Sèptèmber 2015.
  44. ↑ ""What Alexis Tsipras said to Bill Clinton" Τι είπε ο Αλέξης Τσίπρας στον Μπιλ Κλίντον". news247.gr/. Diarsip saka sing asli ing 2018-03-06. Dibukak ing 28 Sèptèmber 2015.
  45. ↑ ""Kammenos in Salamina: rocky islets, fundamentalism and EPIC photos" Καμμένος στη Σαλαμίνα: Βραχονησίδες, φονταμενταλισμός και ΕΠΙΚΕΣ φωτογραφίες". news247.gr. Diarsip saka sing asli ing 2017-11-13. Dibukak ing 30 Sèptèmber 2015.
  46. ↑ ""See Kammenos like another fighter of Salamina....against Xerxes" Δείτε τον Καμμένο σαν άλλο Σαλαμινομάχο κατά... Ξέρξη". www.protothema.gr. Dibukak ing 30 Sèptèmber 2015.
  47. ↑ ""In the military exercise Parmenion was Al. Tsipras" Στη στρατιωτική άσκηση "Παρμενίων" ο Αλ. Τσίπρας". www.naftemporiki.gr. Dibukak ing 9 Oktober 2015.
  48. ↑ "Greece's top tax collector sacked by Tsipras". Financial Times. Dibukak ing 22 Oktober 2015.
  49. ↑ "Tsipras' biggest stress tests yet to come". Reuters. Diarsip saka sing asli ing 2015-11-08. Dibukak ing 2 Novèmber 2015.
  50. ↑ "Alexis Tsipras receives angry reception at Lesbos refugee camp". Independent. Dibukak ing 7 Novèmber 2015.
  51. ↑ ""Panousis: politicians who are connected with terrorists threaten my life" "Βόμβες" Πανούση: Πολιτικοί που έχουν σχέση με τρομοκράτες απειλούν την ζωή μου". www.iefimerida.gr. Dibukak ing 7 Novèmber 2015.
  52. ↑ ""Tsipras for anarchists: Uncalled saviors who think that they can determinate life and death." Τσίπρας για δήθεν αντιεξουσιαστές: Αυτόκλητοι σωτήρες που νομίζουν ότι ορίζουν τη ζωή και το θάνατο". www.protothema.gr. Dibukak ing 17 Novèmber 2015.
  53. ↑ ""Tsipras: We must cooperate with Turkey on the refugee crisis" Αλ. Τσίπρας: Πρέπει να αντιμετωπίσουμε από κοινού με την Τουρκία το προσφυγικό". www.naftemporiki.gr. Dibukak ing 18 Novèmber 2015.
  54. ↑ "Tsipras defies protesters, austerity measures pass". thebricspost. Dibukak ing 9 Mèi 2016.
  55. ↑ "Athens agrees fiscal measures in exchange for debt relief talks". ft. Dibukak ing 22 Mèi 2016.
  56. ↑ "The World Factbook — Central Intelligence Agency". www.cia.gov. Diarsip saka sing asli ing 2016-08-25. Dibukak ing 17 Mèi 2018.
  57. ↑ Bouras, Stelios (4 Novèmber 2016). "Greek Police Clear Anti-Mosque Demonstrators as Golden Dawn Vows to Fight On". Dibukak ing 17 Mèi 2018.
  58. ↑ Amaro, Silvia (2017-07-18). "Greece could return to the bond markets as early as next week". Dibukak ing 2017-07-24.
  59. ↑ "Greece looking at bond market return" (ing basa Inggris). Dibukak ing 2017-07-24.
  60. ↑ "Trump welcomes Greece's Tsipras to White House". Financial Times (ing basa Inggris Karajan Manunggal). 2017-10-18. ISSN 0261-3077. Dibukak ing 2017-10-18.
  61. ↑ "US President meets Greek Prime Minister". ABC News. 2017-10-18. Dibukak ing 2017-10-18.
  62. ↑ Έγινε πατέρας ο Αλέξης Τσίπρας . cosmo.gr. 17 Mèi 2010. Diarsip saka sing asli ing 20 Mèi 2010. Dibukak ing 16 Oktober 2010.
  63. ↑ Smith, Helena (18 Sèptèmber 2014). "Pope Francis the 'pontiff of the poor', says Greece's Alexis Tsipras". The Guardian. Alexis Tsipras – a radical leftist and self-described atheist
  64. ↑ "Greece's far left: The company he keeps". The Economist. 4 Oktober 2014. Mr Tsipras, an atheist
  65. ↑ "These are the religious beliefs of Europe's leaders—including the atheists". Dibukak ing 28 Januari 2015.

Dijupuk saka "https://jv.wikipedia.org/w/index.php?title=Alexis_Tsipras&oldid=1698828"