Guci

Guci ya iku objek wisata kang kondhang karo padusan banyu panas ana ing pèrèng Gunung Slamet. Objek wisata iki ana ing désa kang padha jenengé ing Kacamatan Bumijawa, Kabupatèn Tegal, Provinsi Jawa Tengah. Objek wisata iki sok dikunjungi déning wisatawan-wisatawan lokal, lan mancanagara uga.

Gapura utama obyek wisata Guci ing Bumijawa, Tegal, Jawa Tengah

Fasilitas

Guci duwé 25 pancuran ing papan adusan, kang duwé ukuran panas kang béda. Banyu panas iku di percaya duwé kasiat, ya iku bisa nambani kabèh lelara. Sesawangan ing objek wisata iku tansah gawé segerung mripat kang weruh. Sesawangan ing sakiwa tengene laladan iku éndah, lan katon seger ijo royo-royo. Saliyané duwé sesawangan kang éndah, ing Guci uga disediakake papan-papan kanggo lèrèn, kaya ta warung-warung, papan kanggo nginep (hotèl), bèji banyu anget, lapangan tennis, lapangan bal-balan, lan sapiturute. Ing kono uga nyediakake papan piranti kemah utawa kang sok dijenengi Buper.

Mitos lan ritual

Miturut mitos, banyu panas iku asalé saka Walisanga kang maringi banyu marang salah sijining warga sing diutus kanggo nyebarake agama Islam ing wewengkon Jawa Tengah sisih kulon, lan sakiwa-tengené Tegal. Banyu iku diwadahi ing guci (poci), duwé kasiat, lan berkah, mula objek wisata iku dijenengi guci. Miturut legenda liya, objek wisata iku dijaga déning naga kang tinggal ing gua pèrèng Gunung Slamet. Naga iku sing maringi kasiat ing pancuran banyu panas mau.

Ing saben wengi Jum’at kliwon, objek wisata iki rame déning pengunjung saka warna-warna laladan, amarga saben wengi iku dianakake ritual adus bareng.