Kompeito (金平糖, 金米糖, 金餅糖, こんぺいとう?) inggih punika kembang gula (permèn) tradhisional Jepang [1][2] ingkang awujud kados lintang kanthi manéka warni lan raosipun namung legi kemawon. Setunggal kembang gula padatanipun kanthi diamèter antawisipun 5-10 milimèter [3]. Nama "kompeito" punika asalipun saking Basa Portugis, confeito ingkang ateges gula-gula. Kompeito sareng kaliyan castella lan kembang gula aruheitō dipuntepangaken ing Jepang kirang langkung nalika taun 1550 déning penyadé saking Portugal. Kala punika, tiyang Jepang dèrèng mangertos caranipun damel gula murni. Prosès kanggé damel kembang gula mau mbetahaken gula kanthi cacah ingkang kathah saéngga kompeito punika naté dados panganan ingkang mewah lan langka. Nalika taun 1569, misionaris Portugal Luís Fróis paring persembahan kompeito dhateng Oda Nobunaga nalika nyuwun ijin supados nglampahi pakaryan misionaris ing Jepang.

Kompeito

Prosès damel kompeito besut

Prosès anggènipun damel kompeito punika kalampahan antawisipun satunggal minggu dumugi kalih minggu utawi langkung. Nalika damel kompeito mawi warni, satunggal panci ingkang mubeng dipun-ginakaken kanggé satunggal warni kompeito.

  1. Gula batu dipundamel cair kaliyan toya dumugi dados sirup ingkang kenthel.
  2. Gula kasar (zarame) minangka inti saking kembang gula dipunlebetaken dhateng panci ingkang mubeng utawi ingkang dipunsebat dora. Ing jaman rumiyin, inti saking kembang gula punika wujud wiji Papaver somniferum.
  3. Nalika panci taksih terus mubeng, sirup kenthel ingkang dados kristal sansaya dangu sansaya nglapisi kembang gula saéngga lumah kompeito gadhah gundhukan-gundhukan ingkang dados ciri khas saking kompeito.

Kaginaan kompeito besut

  • Cendera mata astana kaisar
Astana kaisar Jepang gadhah tradisi maringi cendera mata wujud papan kué (kashiki). Kompeito dipun-ginakaken minangka isi papan kué mau supados para rawuh boten nampi wadhah kué ingkang kothong boten wonten isinipun.
  • Cendera mata kanggé resèsi mantènan
Kompeito asring dados salah satunggaling souvenir kanggé para rawuh ingkang dugi ing adicara resèpsi mantènan ing Jepang.
  • Sumber kalori nalika kaanan wigati
Kajawi gula batu, kompeito asring dipunlebetaken ing kalèng biskuit kanggé kepreluan dadakan ing Jepang. Kanthi ancas supados biskuit mau saged dipunsimpen pinten-pinten taun lan rasa boten dados kautamèn. Dipunkajengaken kompeito saged ngrangsang medalipun air liur supados biskuit raosipun tansah echo. Kajawi punika warni-warni kompeito supados saged ngicalaken stess déning tiyang ingkang nembé sisah.

Cathetan suku besut

  1. Wagashi Archived 2013-04-05 at the Wayback Machine., (dipunakses tanggal 24 Fèbruari 2013)
  2. Permen Kompeito[pranala mati permanèn], (dipunakses tanggal 24 Fèbruari 2013)
  3. Aneka Jajanan Khas Jepang, (dipunakses tanggal 24 Fèbruari 2013)

Pranala njaba besut