Pasar Bekonang
Pasar Bekonang ya iku salah sawijining pasar kang mapan ing wewengkon Kecamatan Majalaban, Kabupaten Sukaharja. Pasar iki minangka pasar indhuk. Ana kéné kanggo adol tinuku panganan, janganan, sandhangan, prabotan lan liya-liyané. Nalika dina pasaran Kliwon, Pasar iki kanggo adol tinuku raja kaya, kaya déné wedhus, sapi, bébék, pitik, ménthog lan sapanunggalané.
Legéndha besut
Tlatah iki diwènèhi jeneng Bekonang amarga jaman mbiyen wanci Praja Majapait ana wong ngulandara sing jenengé Kyai Konang. Kyai Konang duwé sipat becik, andhap asor, lan seneng tetulung marang sesama. Nalika iku, Kyai Konang lumaku ing tlatah wetan kali Bengawan Solo banjur dhèwèké leren lan tetepungan karo masarakat asli désa. Pirang-pirang dina ing désa, Kyai Konang ngewangi tandur, angon raja kaya lan dodolan saengga nambah karaharjan wong-wong ing désa iku.
Kyai Konang ngusulaké pawangunan pasar ing tlatah iku. Pirang-pirang sasi diwangun, Pasar iku wis dadi lan diwénéhi jeneng Pasar Bekonang. Masarakat banjur mbukak lapak lan wiwit adol asil panén lan raja kaya ing kana. Suwé-suwé Pasar Bekonang kawentar ing Praja Surakata lan agawé Kyai Anggaspati kang manggon ing Désa Ganggasan, Demakan, Majalaban serik atiné. Kyai Anggaspati nantang tarung Kyai Konang. Sakwisé congkrah pirang-pirang jam, banjur Kyai Anggaspati kawon lan bali menyang Désa Ganggasan. Wong-wong banjur nerusaké pakaryan kaya biasané. Pirang puluh taun kalakonan, Kyai Konang tilar donya lan dikuburaké ana ing pasaréyan Desa Bekonang cedhak Pasar Bekonang.[1]