Samudra Kidul

Limang samudra ing donya

Samudra Kidul Samudra Arktik Samudra Atlantik Samudra Hindia Samudra Pasifik

Samudra Antarktika utawa Samudra Kidul iku massa banyu segara sing ngubengi bawana Antartika. Tlatah iki minangka samudra gedhé dhéwé kapapat lan wis disepakati sinebut samudra déning Organisasi Hidrografik Internasional (IHO) ing taun 2000. Sadurungé iku, pandhangan umum mratélakaké yèn Samudra Atlantik, Samudra Hindia lan Samudra Pasifik langsung wewatesan karo pasisir Antartika.

Koordinat géografi

Samudra Kidul

65 00 LS, 0 00 BT (kanthi nominal), nanging Samudra Kidul duwé béda karakter unik minangka massa banyu segara sing gedhé sing ngubengi bawana Antartika; samudra iki dumunung antara 60° lintang kidul nganti pasisir bawana Antartika, lan nyakup 360° bujur bumi.

Dhéfinisi kanggo Samudra Kidul isih durung padha banget ing saindhenging donya. Australia ménéhi dhéfinisi Samudra Kidul mèmper karo dhéfinisi IHO nanging nglebokaké uga kabèh massa banyu segara sing dumunung antarané pasisir kidul Australia, Tasmania lan Niu Selan minangka Samudra Kidul, dudu Samudra Hindia.

Data

• Jembar: 20.327.000 km²
  • Cathetan: kalebu Segara Amundsen, Segara Bellingshausen, sapérangan saka Drake Passage, Segara Ross, sapérangan cilik saka Segara Scotia, Segara Weddell, lan massa banyu segara tributer liyané
• Garis pasisir: 17.968 km

Iklim

Suhu banyu segara manéka warna antara 10 lan -2°C. Badai siklon lumaku saka arah wétan ngubengi bawana lan kerep banget wujud badai gedhé amarga anané béda suhu sing nyata antara dhataran ès karo segara. Wewengkon samudra saka lintang 40 LS nganti Lingkar Antartika minangka wewengkon kanthi kacepatan angin rata-rata paling kuwat dibandingaké panggonan liyané ing donya. Ing mangsa adhem, samudra njendhel (membeku) nganti 65° LS ing sektor Pasifik lan nganti 55° LS ing sektor Atlantik, suhu lumahing segara mudhun nganti sangisoré 0 °C. Ing sawatara titik ing pasisir bawana, isih tinemu tlatah bébas ès, bab iki disebabaké anané angin sing kuwat sing terus menerus milir saka bawana menyang samudra.

Dhataran

Samudra Kidul, jeroné rata-rata 4.000 - 5.000 m, mung sethithik panggonan kang cethèk. Dhangkalan bawana Antartika lumrahé ciut lan luwih jero (400 – 800 m) katimbang rata-rata jeroné dhangkalan ing bawana liyané (133 m).

Selimut ès Antartika tansaya amba saka minimum 2,6 yuta km² ing sasi Maret nganti dadi 18,8 yuta km² ing sasi September, tegesé ambané nambah mèh tikel pitu. Arus Sirkumpolar Antartika (dawané 21.000 km) mili tumuju menyang arah wétan; minangka arus samudra gedhé dhéwé ing donya, ngilèkaké 130 yuta m³ banyu saben dhetik, tegesé kaping satusé kabèh ilèn banyu kali sing ana ing donya.

Uga delengen

• Antarktika

Pranala njaba

Pirsani informasi ngenani Samudra Kidul ing KamusWiki.

• Oceanography Image of the Day, saka Institusi Oséanografi Woods Hole
• The CIA World Factbook's Samudra Kidul
• The Fifth Ocean saka Geography.About.com
• NOAA In-situ Ocean Data Viewer Plot and download ocean observations
• NOAA FAQ about the number of oceans