Tuduhaké menu pokok

Situs Tunglur iku situs arkéologi wujud candhi prawara cacah telu sing tinemu ing Désa Tunglur ing Kadhiri, Jawa Wétan.

Situs Tunglur
Tetélan pokok
Cakrik yasanCandhi prawara
KuthaKadhiri, Jawa Wétan
Nagara Indonésia
KliènKraton Kadhiri

TetemonBesut

Dunungé Situs Tunglur ana ing Dhusun Sumbereja, Désa Tunglur, Kacamatan Badhas, Kabupatèn Kadhiri. Situs Tunglur kapisan kauninga déning warga désa saka tetemon bata abang gedhé nalika lemah sawijining pakebonan dikedhuk kanggo yasa blumbang.[1] Awit saka lapurané warga, situs iki banjur ditandhangi BPCB Trowulan kanthi èskavasi suwéné 3 dina ing tanggal 1-3 Dhésèmber 2014.[2] Èskavasi kasil nglingkab telung yasan bata abang wujud menara wutuh, kagolong langka ing Kadhiri, sarta rong reca watu.[1]

Tetemon telu mau jinis prawara, utawa candhi anakan, sing diwatara minangka altar pamujan.[1] Durung kaweruhan yasan telu mau kanggo wong ningrat utawa wong cilik sanajan yèn dideleng saka wanguné bokmanawa kanggo wong cilik.[1] Candhi iku uga diwatara diyasa ing jamané Kraton Kadhiri.[1] Panemu kaya mangkono tuwuh awit saka jeroning lemah lan wanguné candhi-candhi ing Tunglur mèmper Situs Tandhawangsa ing cedhak kono sing kabuktèn saka jaman Kraton Kadhiri.[1]

Reca loro uga tinemu ing Situs Tunglur wujud wong wadon lan wong lanang wuda sing tuwané udakara 500 taun.[3] Reca loro iku diwatara minangka simbul Siwah lan Parwati.[3] Mulané, situs iki uga diwatara minangka papan pamujané Siwah.[3] Reca loro mau disimpen ana ing Kantor BPCB Trowulan.[4] Ing Situs Tunglur uga tinemu lingga wutuh mawa Siwabaga (pérangan Siwah), Wisnubaga (pérangan Wisnu), lan Brahmabaga (pérangan Brahma).[1] Pérangan-pérangan iku mratandhani bokmanawa ing kala kapungkur ing pucuking telung yasan ing Situs Tunglur tau madeg reca déwa-déwa iku.[1]

Tumrap BPCB Trowulan, Situs Tunglur iku siji saka telung situs anyar sing ditemu ing taun 2013-2014.[3] BPCB Trowulan nanggenah warga enggonan kanggo ngreksa situs iku.[1]

Cathetan sikilBesut

RéferènsiBesut

Pranala njabaBesut