Timbul Hadiprayitno

Ki Timbul Hadiprayitno (lair ing Bagelèn, Kabupatèn Purwareja, Jawa Tengah, 20 Mèi 1934 – pati ing Bantul, Kabupatèn Bantul, DIY, 10 Mèi 2011 ing umur 76 taun) iku dhalang kondhang kang isih ngugemi pakem padhalangan, mligi padhalangan gagrag Ngayogjakarta.

Ki Timbul Hadiprayitno
Samak album wayang kulit Anggada Duta déning Ki Timbul Hadiprayitno
Lair	20 Mèi 1934 Bagelèn, Kabupatèn Purwareja, Jawa Tengah
Pati	10 Mèi 2011 Bantul, Kabupatèn Bantul, DIY
Pakaryan	Dhalang

Biografi

Dhalang kelairan Bagelèn, Purwareja iki mung lulus Sekolah Rakyat. Wiwit cilik Timbul seneng wayang. Dhèwèké meguru karo akèh dhalang, ing antarané ya iku Wiji Prayitno (bapaké Hadi Sugito), Kasmono, Gondo Margono, Bancak, lan Nartasabda.

Dhalang iki pinter ing sabetan, caturan, lan lakon. Sing paling asring ya iku lakon-lakon banjaran, ya iku lakon wayang kang nyritaaké lelakoné sawijining paraga saka lair nganti mati. Timbul uga salah sijiné dhalang kang bisa ngruwat.

Ing babagan sanggit (gawé lakon dhéwé), Ki Timbul wis gawé sawatara lakon, ya iku ing antarané Wahyu Harjadah, Wahyu Kembang Slombo, Wahyu Panca Purbo, lan Wahyu Mustika Haji.

Kapinterané ing pewayangan nurun marang putra-putrané. Ana enem kang dadi dhalang.